Il fatto quotidiano

“Il fatto quotidiano” es un nove jornal que apparera in le botecas italian le 23 de septembre. Finalmente anque in Italia il habera un jornal de information comparabile con le jornales estranier, e non submittite al voluntate del classe/mafia politic — o al minus on lo spera. Le nove jornal essera redigite per jornalistas de differente orientamentos politic (o de nulle orientamento), accomunate per le desiro de diffunder un information independente. Contrarimente al resto del jornales italian, Il fatto quotidiano non recipera ulle subvention monetari del stato.

Pro informationes super le abonamento, insimul a un pre-vista del jornal, se trova in le sito antefatto.it. Il es un facto curiose e significative, que le abonatos es jam plus que 20000; iste abonatos (io anque es inter illes) ha pagate le jornal in avantia, sin vider le jornal e ergo sin ulle garantia que illo va placer les.
Io me ha abonate al version electronic in PDF, ma il es anque possibile abonar se al version sur papiro.

Hic il ha un video de un incontro de presentation del jornal. De facto io ha positionate le video al parte final, ubi on non parla de Il fatto quotidiano ma de Papi, le plus recente libro scribite per Peter Gomez, Marco Lillo e Marco Travaglio. Il ha alicun notas humoristic, pro illes qui pote comprender le italiano e sape qual es le situation del information in Italia:

Electiones

Le electiones pro le parlamento europee essera tenite inter le 4 e 7 de junio. In Finlandia il es jam possibile votar ora, in tote le officios postal; le problema es que io non cognosce le candidatos finlandese e non ha ancora decidite pro qui votar. Como in occasion del electiones municipal, le sito vaalikone.fi presenta un serie de questiones que permitte al elector de discoperir qual es le candidato qui melio representa su ideas. Infortunatemente tote le questiones in le sito es in finlandese, e io non ha ancora decidite si mi motivationes es sufficiente pro stimular me a traducer los.

Ma io ha trovate que il ha anque un altere sito simile, que es usabile de omne nation e in omne lingua: euprofiler.eu. Quando on entra in le sito on debe scriber in qual nation on va votar, e qual lingua on vole usar; postea on debe selectionar le responsas a 30 questiones super varie themas (alicun questiones es specific pro le nation) e al fin on obtene alicun statisticas que monstra qual es le partitos (non le candidatos, infortunatemente) le plus simile a proprie ideas.

Le lectores qui va votar in Italia non deberea usar iste sito, perque on sape que multe politicos italian dice un cosa e face le exacte opposite; pro le italianos, le unic possibilitate de exir del miseria, del corruption, del racismo, del dictatura politic e mediatic, del derision international, del falsitate e de multe altre males es votar pro le partito Italia dei Valori.

Presentation de “Promemoria”

Promemoria es un exhibition theatral del jornalista Marco Travaglio; illo es un opera teatral multo atipic, perque de facto il se tracta de lectiones informative que ha como themas le episodios del historia italian recente que non es narrate (o es reportate imprecisemente o partialmente) per le altere medios de communication. Ille usa le theatro pro facer information.

Il ha multe videos in youtube que monstra partes del eventos. Durante le festival del giornalismo in Perugia, Promemoria esseva presentate per Peter Gomez e Travaglio mesme; io lo ha trovate interessante e io vos consilia le vision (nota, cata video dura un hora!):

• Intervention de Peter Gomez (le audio initia post alicun secundas)
• Intervention de Marco Travaglio

Bon vision!

Intercepta me!

Ille absconde alique, io non. Intercepta me.

Campania contra le lege a limitar le uso del interceptationes telephonic como instrumento investigative.

P.S.: Esque il es tanto evidente que in iste periodo mi vita non es multo ric de novitates?

Le grande ministros del justitia

In le ultime governamentos, Italia ha habite duo excellente ministros del justitia, que securmente essera recordate in le libros de historia: Clemente Mastella e Angelino Alfano. Mastella es famose pro haber transferite un magistrato que investigava super un question in le qual le ministro mesme esseva involvite, ma es aqua passate (vos pote leger plus super ille in Wikipedia, in italiano e in anglese) perque le nove ministro, Alfano, certemente non es inferior: ille ha demandate al consilio superior del magistratura le transferimento de altere duo magistratos e le expulsion (con blocco del salario) del capo del procura de Salerno, perque le ministro ha judicate que lor investigationes, que illes conduce super le procura de Catanzaro, ubi plure magistratos e politicos es suspectate de corruption, es anormal, mancante de equilibrio e acritic. In realitate, le desiro del classe politic es solmente illo de vilificar le magistratos qui se occupa de casos de corruption de politicos (e de lor amicos), e discreditar le systema judiciari assi que in fin illes es “justificate” in reformar lo. E on ben comprende, que si le governamente Berlusconi reforma ancora le justitia, illo essera transformate in un maniera que illo potera functionar solmente contra le classes social plus debile.
Ma un nova de venerdi passate es que le tribunal incargate del re-examination del requestas de investigation del procura de Salerno ha confirmate que le investigation es justificate e que le investigatores non ha committite ulle irregularitate. E obviemente, iste nova ha essite ignorate per tote le medios de information, a demonstration que le information in Italia es controlate per le regime.

Lo que io ha scribite, probabilmente con plure imprecisiones, es melio explicate in le edition hodierne de Passaparola:

Post que io omitteva de publicar le videos del passaparolas precedente, probabilemente non totes cognosce le historia de iste investigationes. Illos es ben explicate in iste altere editiones (que da un bon quadro del evolution del historia):

• Scontro finale fra partiti e magistratura
• La giustizia dei ricchi
• Associazione Nazionale Magistrati Strabici

Appello desperate al italianos

Io crede que le utilitate de iste petition es proxime al zero, ma post que isto costa nihil, io vos invita a adder vostre nomine al appello:

http://www.liberacittadinanza.it/petizioni/berlusconi-al-quirinale-mai

...a minus que vos non esserea disturbate per le facto de haber Berlusconi como presidente — anque isto es legitime!

Un appello

Al italianos solmente: firma l'appello online contro il cambiamento della costituzione ad opera di un parlamento di corrotti!

Un exemplo a imitar

Io veni de leger iste nova in YLE news: le Ministro del Education, Sari Sarkomaa, ha decidite de abandonar le governamento pro passar plus tempore con su familia. On scribe que le decision non esseva facile, ma que al fin illa es convincite de haber prendite le decision correcte: le carga ministerial la occupava troppo, e illa non plus habeva tempore a dedicar a su filios e a su marito. Illes ha gaudite de su decision, naturalmente.

Io ancora non es secur si le nova es ver: io ha reguardate le calendario pro controlar si hodie il esseva le prime die de April, ma anque le climate non pare multo primaveril. Le sito de YLE news sembla functionar ben, ergo il es improbabile que alicun hacker lo ha violate e ha inserite le nova abusivemente. E io ha verificate con Google News que anque altere sitos reporta le facto. Io vermente non sape que pensar! Io es confuse.

E a illes qui ha habite le mesme idea que io, io va salvar le perdita de tempore pro un triste information: le ministro italian Mariastella Gelmini non es maritate e non ha filios.

Qui commanda le politicos italian?

Io publica un intervento de mi jornalista preferite, Marco Travaglio, registrate durante un conferentia. Le filmato initia in le puncto plus humoristic, in le qual ille describe in qual maniera le governamento italian approbava le lege financiari; le filmato es multo longe, e a mi aviso multo interessante (anque in le parte precedente al puncto ubi io lo face initiar, ma alora illo es plus seriose):

Io signala altere videos interessante:

• Passaparola de lunedi 17 novembre (23 minutas)
• Duo parlamentares de coalitiones theoricamente avversari demonstra que lor partitos es essentialmente le mesme (2 minutas)
• Un motivo pro appreciar Barack Obama (3 minutas)

E, in ultimo, io face notar que io ha addite un nove quadro al fundo al menu del barra sinistre (“Articulos interessante”), que es un lista de ligamines a articulos o novas que io ha legite recentemente, e considera interessante. Forsan vos condivide mi interessamento?

Le electiones municipal in Helsinki

Io imagina que mi lectores poterea esser enoiate per le presentia de tante messages de mal-politica italian; infortunatemente quando io vide o lege super le situation politic e social italian io deveni depresse e ha un besonio incontrollabile de condivider mi sufferentia con alteres. Plus seriemente, le ration es que le maxime parte del personas qui vive in Italia e recipe le “information” del jornales e del television es victimas del manipolation del notitias, e recipe historias false o partial — e usque quando illes va cercar le information in internet, ille non mesmo pote suspectar quanto lor information es corrumpite. Alora io senti le deber de assumer le rolo de incorruptor, e diffunde le information alternative.

Ma io comprende le enoiamento que iste messages de politica italian produce, e alora, pro variar, io va parlar un poco del politica finlandese. Non del chronica del politica finlandese, que io ignora, ma solmente de un facto de actualitate: le electiones municipal in Helsinki. Illos essera le dominca veniente, ma jam desde alicun septimanas le campania electoral es fortemente presente in le citate: manifestos, distribution de foliettos a cata cruciata de stratas, etiquettas sur le sedes del autobuses, kiosques de politicos e del partitos.

Con mi surprisa, io anque recipeva le invito a votar: tote le citatanos del Union Europee qui esseva registrate como residentes in Helsinki al initio de septembre, ha derecto de votar. Le problema es que le maxime parte del politicos ha lor sito internet (o blog) solmente in finnese o svedese, e non in interlingua o un altere lingua que io pote comprender. Io sublinea un inciso: le candidatos es 995 (le sedes disponibile essera 85), e le major parte de illes ha un sito internet o un blog (benque non in interlingua, ma non totes pote esser perfecte), e in multe casos distribue personalmente lor foliettos in le stratas. Inciso a parte, io non crede que il esseva un bon idea permitter le voto al estranieros: un ration es que multes non comprende le finnese e lor selection del canditatos es de consequentia limitate a illes qui communica in anglese interlingua, qui in alicun casos es consciente del situation e profita de illo; le secunde ration, e forsan le plus importante, es que multe de iste estranieros se trova in Helsinki solmente temporaneemente, pro non plus que un anno o duo, e non habera le possibilitate de saper que face le personas que illes ha eligite, e non habera le chance de haber un secunde election in alicun annos: il manca alora le prime medio de controlo del politica, perque on elige un persona e postea on perde le contacto. Ergo il es possibile que un politico se comporta multo mal durante su carga in le concilio de Helsinki e in quatro annos, quando il habera nove electiones, ille essera ancora eligite per altere estranieros qui nihil sape de su passato. E in omne caso, les qui le ha eligite e ha lassate le pais, non plus pote contestar su operato.

Io ha decidite de votar, e debe regratiar (o culpar) le sito www.vaalikone.fi (= machina de election), que offere un servicio multo utile: on debe responder a 20 questiones a responsa multiple (in thema de politica local), pressar un button, e postea le sito crea un lista del candidatos que ha ideas plus simile al tue. Isto functiona perque le sito ha demandate le mesme 20 questiones a cata candidato, recordate lor responsas in un base de datos, e quando tu selige tu responsas, illos es comparate con les de omne canditato, e un indice de similaritate es calculate. Alora, io debeva traducer solmente 20 questiones (e lor possibile responsas) pro trovar le candidato que io ha seligite: un senior corean de circa 60 annos de etate, que es maestro de Taekwondo.

Passaparola del 20 octobre

Como promittite, ecce le passaparola septimanal. Pro illes qui ha ancora plus interesse (e tempore), io recommenda reguardar le registration del presentation del libro “Il ritorno del principe” (le retorno del principe), scribite per le magistrato Roberto Scarpinato e le jornalista Saverio Lodato. Le video del presentation es multo longe, ma fortunatemente il es possibile ascoltar le interventos del diverse relatores singularmente. Totes es multo interessante, ma in particular modo io ha appreciate le prime, per Scarpinato mesme, que anque face comprender le thema (relation inter politica e mafia) e le rationes del libro. Clicca hic pro vider le filmatos.

E nunc, le video de passaparola:

Passaparola!

Passaparola es un rubrica septimanal create per le jornalista investigative Marco Travaglio (pro le anglophonos, vide su biographia hic, e pro le venetos, hic). Mi lectores plus affectionate e de bon memoria, pote probabilemente recognoscer le, post que io jam in passato le “hospitava” in mi blog. In le majo 2008, Travaglio ha create le rubrica Passaparola in su blog: il se tracta de un transmission audiovisive, del durata de circa 20 minutas, in le qual ille parla super un facto de actualitate del politica italian — sovente, illo es un facto que le medios de information traditional o ignora o tracta con multe partialitate. Le transmission es in italiano, e eveni cata lunedi postmeridie como streaming in tempore real ma successivemente pote esser trovate in YouTube, per cercar “travaglio passaparola”

Le rubrica es titulate “passaparola” perque le objectivo es illo de constituer un rete de information alternative inter le citatanos — in Italia non solmente le information de stato, ma quasi le totalitate del medios de information anque private es de facto controlate per le politica, in maniera plus o minus directe. Mi parve contribution a luctar contra iste situation essera le divulgation del serie de Passaparola, si tosto que io los trova in YouTube.

Io probabilemente non va commentar los (ni traducer, isto prenderea troppo de tempore!), ma me limitara a monstrar le video. Ecce lo de iste septimana (le texto es in le sito de Marco Travaglio:

Le reporto de Transparency International

Transparency Internation ha publicate le tabula del “Indice de Perception de Corruction” (CPI, in anglese Corruption Perception Index), que mesura le grado de corruption del officieros e del politicos, derivate per un quantitate de fontes differente.

Iste anno, le situation de Finlandia e Italia se ha pejorate; Finlandia ha passate del prime placia que illo teneva in le 2007, a un misere e vergoniose quinte position, durante que Italia ha precipitate del 41me al 55me placia, que es comocunque un position dignitose pro un pais como le nostre.

Secundo le studio, paises como Botswana, Oman, Bahrain e Bhutan, que io vos defia a locar exactemente in un mappa geographic sin nomines, es minus corrupte que Italia; ma iste studio es obviemente non veritabile, perque illo es in total contrasto con le facto que nulle citatano italian cognosce alicun persona que ha essite effectivemente in prison a causa de corruption!

Ma pro le credulones, ecce le tabulas pro le 2007 e pro le 2008

Napoli retorna in Oriente

In un articulo in le magazin Il Giornale del 19 julio 2008, nostre amatissime prime ministro Silvio Berlusconi annuncia “Io ha reportate Napoli in le Occidente”, pro significar que ille habeva solvite le emergentia del immunditias que desde plure menses (o annos) affligeva le citate. Le problema ha essite “solvite” per portar le immunditias foras del citate e arder los in le periferia, in locos distante del oculos del populo; e impedir omne manifestation de opinion contrari, in violation del articulo 21 del constitution (que nostre politicos non cognosce, ma necuno es perfecte). E finalmente il es un nova de iste dies, que Napoli ha ancora abandonate le Occidente: E illes qui sperava in le establimento del recolta differentiate del immunditias ha essite ancora deluse... P.S.: Si, io sape que io debe ancora publicar le photos de mi vacantias in Sancte Petroburgo! Ma attende, le patientia es le virtute del fortes! (ma io non dice que io va portar Sancte Petroburgo in Occidente...)

Le presidente del republica italian ignora le constitution?

(pro le lectores qui lege iste blog pro le prime vice: le lingua usate es interlingua, un lingua international immediatemente comprensibile per milliones de personas sin necessitate de studio previe) Giorgio Napolitano, le actual presidente italian, ha heri (23 Julio 2008) firmate un importante lege, technicamente appellate “lodo Alfano” (e non technicamente appellate “lege porcada”), que dona le immunitate juridic total al quatro plus importante cargas politic pro le exercitio de lor mission: le presidente del republica, le prime ministro (qui actualmente es le sempre-innocente Silvio Berlusconi), e le presidentes del duo cameras parlamentari. Iste lege, que esseva necessari pro ridiculisar le democratia italian, pare esser in conflicto con le tertie articulo del constitution italian, que dice: “Tote citatanos [...] es equal in fronte al lege, sin distinction de sexo, racia, lingua, religion, opiniones politic, conditiones personal e social. [...]”. Le “lodo Alfano” es un lege ordinari, ergo illo non pote contradicer o modificar lo que es scripte in le constitution (solmente un lege constitutional pote limitar un lege constitutional); ma alora, como conciliar le duo cosas? Le conclusion es simple: si tote citatanos es equal in fronte al lege, ma le presidente del republica e su amicos intime non lo es, isto significa que iste quatro personas non es citatanos italian. Le presidente del republica italian, durante le periodo de su carga, non es un citatano italian. Esque ille va restituer su passaporto? In omne caso, le italianos es governate per quatro refugiatos, que ha un altissime probabilitate de esser criminal: de facto, benque le impunitate dura solmente pro le periodo de lor mission, le facto que illes es vetule e le lentessa del justitia italian es quasi un garantia que illes nunquam pagara pro lor crimines — que illes pote committer apertemente. Que pote facer le citatanos italian pro stoppar iste “banda del quatros”, como le popular humorista Beppe Grillo los appella? Si le justitia non ha poter super illes, le unic maniera es eliminar les physicamente, ma le lege non lo consenti. Alora, on pote solmente attender, e sperar que le natura face su corso rapidemente, ante que illes committe crimines irreparabile. Deo, salva nos! Mi dedica al membros del banda del quatro

Il confronto Veltroni - Berlusconi

(io scribe in italiano perque io dubita que non-italianos es interessate in isto!) Diffondo un video tratto dalla trasmissione Annozero di qualche tempo fa, in cui il giornalista indipendente (uno dei pochi!) Marco Travaglio lamenta l'assenza di un confronto tra i leader dei due maggiori partiti italiani: Restando in tema di elezioni (io ho già votato qualche giorno fa), presento un altro video tratto dalla stessa trasmissione in cui Travaglio parla delle liste dei candidati alle camere, togliendoci ogni dubbio circa l'onorabilità dei futuri onorevoli: Quindi, per concludere, pubblicità progresso, per ricordare qual è l'unico partito pulito:

Electiones in Finlandia; nostalgia del politica italian

Le 18 de martio in Finlandia on vota pro eliger le membros del parlamento, qui restara in carga pro quatro annos. Io ha prendite un pauco de photos del candidatos, e los ha ponite in le album Electiones parlamentar 2007, assi que totes pote vider le bellessa del politicos finnese. Burlas a parte, quando on reguarda iste photos il es impossibile non pensar al politicos italian, a lor juventude, sympathia, varietate. Le politicos italian es tote equal: mascule, circa 60 annos, corruptibile o corrupte (isto depende de quante tempore ille es in politica), incompetente super tote le innovationes technologic e scientific del ultime 30 annos, e a vices de tote le innovationes del ultime 20 seculos. Il suffice reguardar le photos del politicos finnese pro comprender que in Finlandia le situation es differente: reguarda le numero de feminas e le etate medie del candidatos! Il non es difficile imaginar que plure de iste personas sape que es un computator, que es internet, Linux; que illes non ha un autista personal e un jet private, e sape comprar un bilietto pro viagiar in un tram o in un autobus. Que illes non ha committite reatos que debe esser condonate con un lege apposite, que illes non ha un interprisa moribunde a subventionar. Que illes non ha un rete de cognoscentias politic tal que cata uno cognosce le corruptiones del alteres, e los tace perque ille mesme es corrupte. Le politicos finnese non ha besonio de un escorta de guardias quando illes se promena per le citate. Le personas que vos vide in iste photos de propaganda electoral proveni del ambientes le plus differente; de cata persona on dice qual es su occupation. E le "politica" non es un occupation! Illo non es un carriera. Le maxime parte de iste personas tornara a su occupation, quando lor mandato parlamentar terminara. Ma post que un certe quantitate de absurditate debe sempre exister in omne systema, io va signalar vos le sito www.naama.fi, que es un motor de reconoscimento de tu candidato ideal: on debe cargar un proprie photo in le sito (in le quadro "Kuvan valinta"), cliccar sur "Hae ehdokkaat", e post alicun secundos un intelligentissime systema de riconoscimento graphic presentara un lista del 4 candidatos parlamentar que es plus proxime a vos, con un numero percentual que indica le grado de similiantia. Io etiam ha volite probar, pro pur curiositate. Le prime proba ha essite con le photo de mi ciambella, ma le sito es plus intelligente de lo que io pensava e ha recognoscite que in ille photo il habeva nulle viso de persona. Alora, io ha probate con mi ver photo, e le resultato es J. Jaakko J. Siivonen, un candidato qui ha... attention attention... 19 annos! Quando nos habera in Italia un candidato al electiones parlamentar tanto juvene, que non sia filio de un altere politico? Le problema (o melio, un del tantes!) del systema electoral italian es que actualmente illo non permitte le selection directe del candidato, assi que le selection es operate per le partitos mesme, que obviemente propone le solite politicos italian que non ha minus de 50 annos e que es bastante corrupte pro non rumper le ecosystema de falsitate del nostre politica. In Finlandia cata candidato ha un numero; on vota directemente le candidato, e le numero del sedes in le parlamento es calculate considerante le votos del candidato e del summa del votos del candidatos del mesme partito: lo que resulta de iste calculationes es, pro exemplo, que si nulle persona vota le candidato Berlusconen, ille non essera electe! Ma in Italia nos es plen de politicos qui sta in le parlamento de tempores immemorabile, e il es impossibile remover les de lor sede. Esque vos vide mi lacrimas de nostalgia?