sabato 31 marzo 2007

Pitagora... que??

YouTube e Google Video es un ver miniera de "guastatempore": quando on ha alicun minutos a perder, on pote navigar in le enorme archivo de videos e trovar un modo pro passar le tempore que non require quasi ulle activitate cerebral. Un sorta de television, con le importante differentia que con iste systemas on ha un major controlo super lo que on vole vider. Ma non sempre. In un del frequente momentos de stand-by de mi meninges, io ha cadite sur iste video japonese, que vole condivider con vos, in le sperantia que mi car fratre Andrea pote dar nos alicun explicationes super le motivationes que porta le Japoneses a complir iste cosas folle.

domenica 18 marzo 2007

Vamos OpenSource!

Le 9 de martio le management de Nokia ha approbate le publication de mission-control como software libere sub licentia LGPL, e Naba ha immediatemente initiate le operationes pro le distribution de mission-control in le sito de SourceForge. Le passo successive ha essite annunciar le nova al personas qui pote esser interessate. Io scribe iste articulo super MissionControl perque io etiam ha contribuite a su realisation, e lo mantene activemente. Il es difficile explicar al non-informaticos (e a vices etiam al informaticos!) qual es le functionalitate de mission-control, perque illo non es un programma autonome, ma un componente del architectura Telepathy. Pro dar un information partial, incorrecte ma suggestive, io va dicer que illo es le "coordinator" del canales que le programmas de communication (chat textual, o con audio e video) necessita pro le transferimento del datos. Mmmm... no, vos non debe comprender; io lo ha scribite solmente pro dar le impression que le paragrapho es complete. :-) Le programmatores qui labora con Telepathy ha immediatamente initiate a utilisar mission-control, lo que me rende felice (e occupate a solver le errores que illes me signala!).
Cambio de thema: ante alicun dies io scribeva que le hiberno ha finite... ma heri e hodie le temperatura ha retornate proxime al 0 grados e durante que io scribe iste lineas le neve cade intensemente a uniformar le colores del jardin. Le photos ha essite prendite a distantia de 40 minutas — si, io sape que pro un nordico isto es perfectemente normal, ma pro me le nive es ancora le joco del infante que io porta intra me (e etiam foras, a vices ;-) ).

venerdì 16 marzo 2007

Electiones in Finlandia; nostalgia del politica italian

Le 18 de martio in Finlandia on vota pro eliger le membros del parlamento, qui restara in carga pro quatro annos. Io ha prendite un pauco de photos del candidatos, e los ha ponite in le album Electiones parlamentar 2007, assi que totes pote vider le bellessa del politicos finnese. Burlas a parte, quando on reguarda iste photos il es impossibile non pensar al politicos italian, a lor juventude, sympathia, varietate. Le politicos italian es tote equal: mascule, circa 60 annos, corruptibile o corrupte (isto depende de quante tempore ille es in politica), incompetente super tote le innovationes technologic e scientific del ultime 30 annos, e a vices de tote le innovationes del ultime 20 seculos. Il suffice reguardar le photos del politicos finnese pro comprender que in Finlandia le situation es differente: reguarda le numero de feminas e le etate medie del candidatos! Il non es difficile imaginar que plure de iste personas sape que es un computator, que es internet, Linux; que illes non ha un autista personal e un jet private, e sape comprar un bilietto pro viagiar in un tram o in un autobus. Que illes non ha committite reatos que debe esser condonate con un lege apposite, que illes non ha un interprisa moribunde a subventionar. Que illes non ha un rete de cognoscentias politic tal que cata uno cognosce le corruptiones del alteres, e los tace perque ille mesme es corrupte. Le politicos finnese non ha besonio de un escorta de guardias quando illes se promena per le citate. Le personas que vos vide in iste photos de propaganda electoral proveni del ambientes le plus differente; de cata persona on dice qual es su occupation. E le "politica" non es un occupation! Illo non es un carriera. Le maxime parte de iste personas tornara a su occupation, quando lor mandato parlamentar terminara. Ma post que un certe quantitate de absurditate debe sempre exister in omne systema, io va signalar vos le sito www.naama.fi, que es un motor de reconoscimento de tu candidato ideal: on debe cargar un proprie photo in le sito (in le quadro "Kuvan valinta"), cliccar sur "Hae ehdokkaat", e post alicun secundos un intelligentissime systema de riconoscimento graphic presentara un lista del 4 candidatos parlamentar que es plus proxime a vos, con un numero percentual que indica le grado de similiantia. Io etiam ha volite probar, pro pur curiositate. Le prime proba ha essite con le photo de mi ciambella, ma le sito es plus intelligente de lo que io pensava e ha recognoscite que in ille photo il habeva nulle viso de persona. Alora, io ha probate con mi ver photo, e le resultato es J. Jaakko J. Siivonen, un candidato qui ha... attention attention... 19 annos! Quando nos habera in Italia un candidato al electiones parlamentar tanto juvene, que non sia filio de un altere politico? Le problema (o melio, un del tantes!) del systema electoral italian es que actualmente illo non permitte le selection directe del candidato, assi que le selection es operate per le partitos mesme, que obviemente propone le solite politicos italian que non ha minus de 50 annos e que es bastante corrupte pro non rumper le ecosystema de falsitate del nostre politica. In Finlandia cata candidato ha un numero; on vota directemente le candidato, e le numero del sedes in le parlamento es calculate considerante le votos del candidato e del summa del votos del candidatos del mesme partito: lo que resulta de iste calculationes es, pro exemplo, que si nulle persona vota le candidato Berlusconen, ille non essera electe! Ma in Italia nos es plen de politicos qui sta in le parlamento de tempores immemorabile, e il es impossibile remover les de lor sede. Esque vos vide mi lacrimas de nostalgia?

Etichette:

domenica 11 marzo 2007

Adeo, hiberno!

Iste imagine, prendite del sito del Instituto Metereologic de Helsinki, testimonia que le hiberno es concluse. Iste matino il cadeva un pauco de nive, ma subito dispareva sin lassar tracias; il resta ancora multe nive del menses passate, que se ha transformate in glacie e que nunc se funde lentamente in aqua sordide. Le dies ha devenite multo plus luminose, e finalmente le 21 de martio on habera un democratia solar, que assignara le mesme quantitate de sol a tote le partes del Terra. Mi prime hiberno in Finlandia ha passate sin multe difficultates; le obscuritate de decembre non me ha deprimite usque al suicidio, e le -24 grados non me ha glaciate comletemente (ma forsan illos ha rendite mi cerebro un pauco plus lente?). Io ha experientiate le patinage sur glacio, le immersion in le aqua frigide post un sauna, un pauco de descensas con slittas; il manca le ski, que on pote re-schedular pro le anno veniente, ma io non es specialmente interessate in illo. Io haberea volite facer plus practica de patinage sur glacie, que io ama multo ben que io es totalmente inhabile in illo. Ma vamos parlar de isto in le sequente hiberno!

sabato 10 marzo 2007

Retorno a Italia

Mi sequente visita a Italia es fixate: del 5 al 10 de april. De facto le 10 non es un die a considerar, perque io partira multo tosto in le matino (forsan "nocte" es plus appropriate): le avion parti al horas 6:40 de Venetia, lo que significa que io debera esser in le aeroporto a 5:00 horas, e probabilemente eveliar me ante 4:00 horas. Le mission me pare impossibile, ma io es fiduciose que in alicun maniera io essera expellite del Italia con successo. Mi collega e amico Andrea me ha informate que il es conveniente demandar le carta Miles & More de Lufthansa: iste carta permitte de ganiar viages gratuite quando on supera un certe quantitate de kilometros — io time que io nunquam attingera le numero necessari, ma post que le carta es gratuite on ha apparentemente nihil a perder in requestar lo. Vamos probar...