Il fatto quotidiano

“Il fatto quotidiano” es un nove jornal que apparera in le botecas italian le 23 de septembre. Finalmente anque in Italia il habera un jornal de information comparabile con le jornales estranier, e non submittite al voluntate del classe/mafia politic — o al minus on lo spera. Le nove jornal essera redigite per jornalistas de differente orientamentos politic (o de nulle orientamento), accomunate per le desiro de diffunder un information independente. Contrarimente al resto del jornales italian, Il fatto quotidiano non recipera ulle subvention monetari del stato.

Pro informationes super le abonamento, insimul a un pre-vista del jornal, se trova in le sito antefatto.it. Il es un facto curiose e significative, que le abonatos es jam plus que 20000; iste abonatos (io anque es inter illes) ha pagate le jornal in avantia, sin vider le jornal e ergo sin ulle garantia que illo va placer les.
Io me ha abonate al version electronic in PDF, ma il es anque possibile abonar se al version sur papiro.

Hic il ha un video de un incontro de presentation del jornal. De facto io ha positionate le video al parte final, ubi on non parla de Il fatto quotidiano ma de Papi, le plus recente libro scribite per Peter Gomez, Marco Lillo e Marco Travaglio. Il ha alicun notas humoristic, pro illes qui pote comprender le italiano e sape qual es le situation del information in Italia:

Presentation de “Promemoria”

Promemoria es un exhibition theatral del jornalista Marco Travaglio; illo es un opera teatral multo atipic, perque de facto il se tracta de lectiones informative que ha como themas le episodios del historia italian recente que non es narrate (o es reportate imprecisemente o partialmente) per le altere medios de communication. Ille usa le theatro pro facer information.

Il ha multe videos in youtube que monstra partes del eventos. Durante le festival del giornalismo in Perugia, Promemoria esseva presentate per Peter Gomez e Travaglio mesme; io lo ha trovate interessante e io vos consilia le vision (nota, cata video dura un hora!):

• Intervention de Peter Gomez (le audio initia post alicun secundas)
• Intervention de Marco Travaglio

Bon vision!

Le seisma de l'Aquila e le campanias de disinformation

Annozero es mi unic puncto de contacto con le television italian, sia perque le episodios es visibile in internet, sia perque io non cognosce altere transmissiones que poterea interessar me. Le ultime episodio, appellate "Resurrezione", pone al centro del debatto le seisma que le 6 de april ha colpate l'Aquila, e in particular le difficultates in le gestion del emergentia — retardos e inefficientias in le adjutas — e le inexplicabile impreparation del protection civil que ha de facto ignorate le perturbationes seismic que jam existeva desde plure menses in ille region.

Le altere medios de information, efficacemente controlate per le regime, non ha hesitate a criticar Annozero e lo ha accusate de haber offendite le labor del voluntarios qui presta lor adjuta al population (accusation false, post que le unic criticas que emergeva in le debatto esseva al machina organisative). Con le exception del IDV (Italia dei valori, un del partitos del opposition), quasi nulle voce se ha levate pro defender le transmission Annozero e, in general, le libertate de information. Le situation es ben describite per Marco Travaglio in su monologo Passaparola:

Io invita totes illes qui comprende le italiano a reguardar le episodio “Resurrezione” de Annozero e a judicar per lor mesme. Le usatores de Linux pote discargar le episodio con le programma MPlayer, in iste maniera:

mplayer -dumpstream -playlist http://mediapolis.rai.it/relinker/relinkerServlet.htm?cont=po0zfTC8FmAeeqqEEqual

Ma pro concluder con un surriso, io vos lassa con iste photo, un del multissime que on pote trovar in flickr e que me place specialmente.

Venezia

Le photos de mi vacantias in Italia es disponibile a reflecter le photons de lumine que vos volera dedicar los. Il ha duo nove albums in le galleria, uno super le promenada a Venezia e le altere super le presepio vivente de Santa Cristina¹. Altere photos que io publicara in le dies veniente es relative al sojorno in Voltago, un village in le Alpes.

In ultra a poner le photos in le galleria, io los ha anque cargate in mi acconto de Flickr, que io ha desde plure tempore ma que hesitava a propagandar perque io dubitava que io haberea continuate a usar lo. Ma le servicio offerite per Flickr es decisemente valide: in ultra a un commode interfacie pro le vision del photographias, Flickr face abundante uso del tagging (etiquettamento), que permitte le archiviation del photos in un maniera que facilita le recerca, e in ultra consenti le placiamento del imagines in le mappas de Yahoo. Iste ultime operation es totalmente automatic, si le photos jam es marcate con lor latitude e longitudine (cosa que io face gratias al GPS includite in le N810 e a Maemo mapper). Si vos reguarda mi photos de Venezia o le photos del presepio in Flickr, vos videra que in le section Additional Information ha un ligamine appellate “map”; si on clicca super illo, il apparera un mappa con le location ubi le photo esseva prendite (illo indica le location del photographo, e non del subjecto del photo):

In le album de Venetia, assi como in altere albums que io va publicar in futuro, il ha alicun photos que es visibile solmente per mi amicos (perque illos es photo plus personal); pro vider los, on debe crear un acconto Flickr (iste operation es gratuite) e facer un requesta de adder me a vostre contactos, e attender que io accepta vostre requesta (iste operation, in vice, pote resultar multo expensive).

¹Le presepio o presepe es un representation del nativitate de Christo. Vide anque le pagina italian de Wikipedia circa le presepe

Nive a Paese (Treviso, Italia)

Iste matino foras del fenestra io ha potite admirar un poco de nive, cadite durante le nocte.

Un appello

Al italianos solmente: firma l'appello online contro il cambiamento della costituzione ad opera di un parlamento di corrotti!

Passaparola del 20 octobre

Como promittite, ecce le passaparola septimanal. Pro illes qui ha ancora plus interesse (e tempore), io recommenda reguardar le registration del presentation del libro “Il ritorno del principe” (le retorno del principe), scribite per le magistrato Roberto Scarpinato e le jornalista Saverio Lodato. Le video del presentation es multo longe, ma fortunatemente il es possibile ascoltar le interventos del diverse relatores singularmente. Totes es multo interessante, ma in particular modo io ha appreciate le prime, per Scarpinato mesme, que anque face comprender le thema (relation inter politica e mafia) e le rationes del libro. Clicca hic pro vider le filmatos.

E nunc, le video de passaparola:

Passaparola!

Passaparola es un rubrica septimanal create per le jornalista investigative Marco Travaglio (pro le anglophonos, vide su biographia hic, e pro le venetos, hic). Mi lectores plus affectionate e de bon memoria, pote probabilemente recognoscer le, post que io jam in passato le “hospitava” in mi blog. In le majo 2008, Travaglio ha create le rubrica Passaparola in su blog: il se tracta de un transmission audiovisive, del durata de circa 20 minutas, in le qual ille parla super un facto de actualitate del politica italian — sovente, illo es un facto que le medios de information traditional o ignora o tracta con multe partialitate. Le transmission es in italiano, e eveni cata lunedi postmeridie como streaming in tempore real ma successivemente pote esser trovate in YouTube, per cercar “travaglio passaparola”

Le rubrica es titulate “passaparola” perque le objectivo es illo de constituer un rete de information alternative inter le citatanos — in Italia non solmente le information de stato, ma quasi le totalitate del medios de information anque private es de facto controlate per le politica, in maniera plus o minus directe. Mi parve contribution a luctar contra iste situation essera le divulgation del serie de Passaparola, si tosto que io los trova in YouTube.

Io probabilemente non va commentar los (ni traducer, isto prenderea troppo de tempore!), ma me limitara a monstrar le video. Ecce lo de iste septimana (le texto es in le sito de Marco Travaglio: