lunedì 1 giugno 2009

Electiones

Le electiones pro le parlamento europee essera tenite inter le 4 e 7 de junio. In Finlandia il es jam possibile votar ora, in tote le officios postal; le problema es que io non cognosce le candidatos finlandese e non ha ancora decidite pro qui votar. Como in occasion del electiones municipal, le sito vaalikone.fi presenta un serie de questiones que permitte al elector de discoperir qual es le candidato qui melio representa su ideas. Infortunatemente tote le questiones in le sito es in finlandese, e io non ha ancora decidite si mi motivationes es sufficiente pro stimular me a traducer los.

Ma io ha trovate que il ha anque un altere sito simile, que es usabile de omne nation e in omne lingua: euprofiler.eu. Quando on entra in le sito on debe scriber in qual nation on va votar, e qual lingua on vole usar; postea on debe selectionar le responsas a 30 questiones super varie themas (alicun questiones es specific pro le nation) e al fin on obtene alicun statisticas que monstra qual es le partitos (non le candidatos, infortunatemente) le plus simile a proprie ideas.

Le lectores qui va votar in Italia non deberea usar iste sito, perque on sape que multe politicos italian dice un cosa e face le exacte opposite; pro le italianos, le unic possibilitate de exir del miseria, del corruption, del racismo, del dictatura politic e mediatic, del derision international, del falsitate e de multe altre males es votar pro le partito Italia dei Valori.

Etichette: , ,

domenica 31 maggio 2009

Estate finlandese

Le estate ha arrivate. Hodie e heri le temperatura esseva circa 25 grados, le celo esseva blau, sin nubes, e le sol splendeva super Helsinki. Con le amicos del theatro, io habeva un picnic in Suomenlinna. Le sol rostiva mi pelle mediterranee, que non es usate a un sol tanto forte.

Io photographava un laro que volava super le campo del picnics a cercar nutrimento (nota su expression seriose e concentratissime):


Nota que le angulos del photo es plus scur que le centro. Qui sape perque?

Infortunatemente le estate finlandese non es multo longe. De facto, illo jam es quasi finite:

Tosto il va cader nive.

Etichette: ,

giovedì 11 dicembre 2008

Un exemplo a imitar

Io veni de leger iste nova in YLE news: le Ministro del Education, Sari Sarkomaa, ha decidite de abandonar le governamento pro passar plus tempore con su familia. On scribe que le decision non esseva facile, ma que al fin illa es convincite de haber prendite le decision correcte: le carga ministerial la occupava troppo, e illa non plus habeva tempore a dedicar a su filios e a su marito. Illes ha gaudite de su decision, naturalmente.

Io ancora non es secur si le nova es ver: io ha reguardate le calendario pro controlar si hodie il esseva le prime die de April, ma anque le climate non pare multo primaveril. Le sito de YLE news sembla functionar ben, ergo il es improbabile que alicun hacker lo ha violate e ha inserite le nova abusivemente. E io ha verificate con Google News que anque altere sitos reporta le facto. Io vermente non sape que pensar! Io es confuse.

E a illes qui ha habite le mesme idea que io, io va salvar le perdita de tempore pro un triste information: le ministro italian Mariastella Gelmini non es maritate e non ha filios.

Etichette: ,

domenica 2 novembre 2008

Le votos perdite

Venerdi anque le magazin electronic italian Punto Informatico dava le notitia del perdita de 232 votos electronic durante le ultime electiones municipal. Iste 232 votos es le 2% del votos total in le municipalitates ubi le systema de votation electronic esseva usate; benque le percentual non es immensamente grande, in iste typo de electiones le differentia de un o duo votos es sufficiente a determinar le successo o le insuccesso de un candidato, ergo le problema non es ignorabile. Le section finlandese de Electronic Frontier Foundation, jam in Junio 2008 publicava un reporto que criticava le systema de votos electronic de Finlandia, que io arbitrarimente summarisa in le duo punctos que pro me es plus importante:

  1. Le codice del programma de e-voting debe esser public, durante que illo que es usate in Finlandia es mantenite secrete
  2. Le votante deberea haber un quitantia de voto, i.e. un prova que demonstra que su voto esseva recepite e registrate correctemente

Altere criticas esseva mirate al systema de verification del votos, al absentia de un possibilitate de un recalculation confidibile del votos, e al insecuritate del systema, que poterea permitter a un hacker qui accessava le base de datos de cognoscer le voto de omne votante. Tote iste criticas es valide, ma me portava a reflecter super le systema de voto traditional; quanto secur es illo?
Io non sape si le systema de voto es le mesme in omne pais, ma al minus in Italia e Finlandia illo es multo simile: le votante va con su scheda electoral in un cabina, de maniera que ille non es visibile, e scribe le numero de candidato que ille vole votar (o, in le statos non democratic (clicca sur le ligamine pro vider como le stato italian spendeva 50 milliones de euro), marca con un cruce le symbolo del partito que ille pensa esser minus corrupte). Postea, le votante insere le scheda in un cassa, e retorna felicemente a su casa. Ma como pote ille esser secur que su voto essera contate, e registrate correctemente? Le personas cargate de calcular le votos poterea esser corrupte, e registrar le voto a un altere candidato o partito politic — certemente isto essere discoperite si le authoritates commandava un recalculation del votos, ma quanto es isto probabile? Si le calculatores modifica “solmente” le 2-3% del votos, probabilemente necuno va suspectar ulle conspiration! E le situation es ancora plus ridicule in le statos ubi le votantes debe scriber lor selection usante non un penna, ma un stilo de graphite (!!!) que quicunque poterea cancellar con un simple gumma e cambiar le voto al partito que paga plus. Benque tote nos es secur que un tal evento non es realisabile in nostre pais, on non pote negar que le possibilitate theoric existe.

Io pensa que il esserea simple crear un systema de votation qui rende quasi impossibile le alteration del resultatos: le votantes mesme controla lor voto. Il esserea sufficiente que in cata scheda electoral il habeva un parve quadretto, per exemplo de 2cm x 2cm, intra le qual le votante es libere de scriber/designar toto lo que ille vole. Iste quadretto esserea duplicate in un folio de papyro que sta sub le folio original, per exemplo con un technica de papyro de carbon, e le copia esserea lassate al votante, como documento de prova de votation. Postea, in phase de calculation del votos, tote le schedas (o simplemente lor quadrettos designate) es passate per un scanner, e le imagines del quadrettos es memorisate in un base de datos, accompaniate per le numero del candidato seligite in le scheda. Al termino del votationes, cata section publica, in le internet e in le jornales local, le lista complete del votos, ordinate per partito/candidato, accompaniate per tote le imagines del designos. Assi que cata votante pote verificar in le internet o in un jornal si su voto ha essite registrate correctemente, e in caso que il ha errores, ille porta le copia de su scheda electora que demonstra que su voto esseva differente.

Io exemplifica le processo con designos:


Le scheda de voto, a compilar

Le scheda de voto, compilate con le voto e le marca de controlo

Le copia del scheda de voto, que resta al votante como prova de votation.

Le publication del votos, in internet o in un jornal: le votante pote cercar su voto, e verificar que illo ha essite registrate.

Le voto communicate per iste systema continuarea a esser ancora anonyme, e le systema poterea esser perfectionate per non publicar le imagine de controlo integralmente, ma partialmente (per exemplo, a bandas parallel).

E io es certe que ideas multo melior poterea esser trovate, si il habeva le voluntate.

Etichette:

martedì 21 ottobre 2008

Le electiones municipal in Helsinki

Io imagina que mi lectores poterea esser enoiate per le presentia de tante messages de mal-politica italian; infortunatemente quando io vide o lege super le situation politic e social italian io deveni depresse e ha un besonio incontrollabile de condivider mi sufferentia con alteres. Plus seriemente, le ration es que le maxime parte del personas qui vive in Italia e recipe le “information” del jornales e del television es victimas del manipolation del notitias, e recipe historias false o partial — e usque quando illes va cercar le information in internet, ille non mesmo pote suspectar quanto lor information es corrumpite. Alora io senti le deber de assumer le rolo de incorruptor, e diffunde le information alternative.

Ma io comprende le enoiamento que iste messages de politica italian produce, e alora, pro variar, io va parlar un poco del politica finlandese. Non del chronica del politica finlandese, que io ignora, ma solmente de un facto de actualitate: le electiones municipal in Helsinki. Illos essera le dominca veniente, ma jam desde alicun septimanas le campania electoral es fortemente presente in le citate: manifestos, distribution de foliettos a cata cruciata de stratas, etiquettas sur le sedes del autobuses, kiosques de politicos e del partitos.

Con mi surprisa, io anque recipeva le invito a votar: tote le citatanos del Union Europee qui esseva registrate como residentes in Helsinki al initio de septembre, ha derecto de votar. Le problema es que le maxime parte del politicos ha lor sito internet (o blog) solmente in finnese o svedese, e non in interlingua o un altere lingua que io pote comprender. Io sublinea un inciso: le candidatos es 995 (le sedes disponibile essera 85), e le major parte de illes ha un sito internet o un blog (benque non in interlingua, ma non totes pote esser perfecte), e in multe casos distribue personalmente lor foliettos in le stratas. Inciso a parte, io non crede que il esseva un bon idea permitter le voto al estranieros: un ration es que multes non comprende le finnese e lor selection del canditatos es de consequentia limitate a illes qui communica in anglese interlingua, qui in alicun casos es consciente del situation e profita de illo; le secunde ration, e forsan le plus importante, es que multe de iste estranieros se trova in Helsinki solmente temporaneemente, pro non plus que un anno o duo, e non habera le possibilitate de saper que face le personas que illes ha eligite, e non habera le chance de haber un secunde election in alicun annos: il manca alora le prime medio de controlo del politica, perque on elige un persona e postea on perde le contacto. Ergo il es possibile que un politico se comporta multo mal durante su carga in le concilio de Helsinki e in quatro annos, quando il habera nove electiones, ille essera ancora eligite per altere estranieros qui nihil sape de su passato. E in omne caso, les qui le ha eligite e ha lassate le pais, non plus pote contestar su operato.

Io ha decidite de votar, e debe regratiar (o culpar) le sito www.vaalikone.fi (= machina de election), que offere un servicio multo utile: on debe responder a 20 questiones a responsa multiple (in thema de politica local), pressar un button, e postea le sito crea un lista del candidatos que ha ideas plus simile al tue. Isto functiona perque le sito ha demandate le mesme 20 questiones a cata candidato, recordate lor responsas in un base de datos, e quando tu selige tu responsas, illos es comparate con les de omne canditato, e un indice de similaritate es calculate. Alora, io debeva traducer solmente 20 questiones (e lor possibile responsas) pro trovar le candidato que io ha seligite: un senior corean de circa 60 annos de etate, que es maestro de Taekwondo.

Etichette: , ,