Nove adresse

Io ha movite le blog a un nove adresse: http://blog.mardy.it. Si vos ha mi sito in vostre lista de sitos preferite, vole ben actualisar le adresse.

Isto essera le ultime message in www.mardy.it

In ultra, io ha decidite de scriber plus frequentemente super cosas computatorial, e io va facer lo in lingua anglese (le ration del selection del lingua es que iste articulos technic pote esser includite in altere sitos plus grande, que totevia permitte le usage del sol lingua anglese). Si vos crede que vos essera enoiate per iste articulos, que pote esser in numero multo major que mi articulos in interlingua, alora usa iste adresse: http://blog.mardy.it/search/label/interlingua

Actualisation de maemo Mapper

Maemo Mapper, originally uploaded by mardy78.

In le passate septimana io continuava a laborar super Mapper e implementava un pannello (in alto a dextera) con informationes super le strata percurse (in rubie) e le strata a percurrer (in verde).
Le informationes super le strata percurse monstra le distantia e le tempore total (in horas:minutas). A latere del parve bandera verde il ha le longor total del route, e le informationes a latere del puncto verde monstra le distantia verso le proxime puncto del route e le description de iste puncto.

Iste matino io lo experimentava, in un breve cursa con mi amicos. Post pauc plus que duo kilometros io debeva stoppar me, perque mi respiro non plus esseva sufficiente pro currer. Isto pote esser causate per le aere frigide (il esseva circa 0 grados), ma plus probabilemente le ration es que io non es ben trainate, e forsan le rhythmo esseva troppo rapide pro mi condition. Alora, io continuava, alternante cammino e cursa lente. Vos pote vider le analyse del percurso in runsaturday.com.

-20

Io ha passate un septimana in casa, a causa del influentia. Finalmente, mi condition ha initiate ameliorar se durante le ultime dies, e benque io ha ancora alicun symptomas residual, io me senti multo plus ben.

Ma pro haber un mesura plus scientific super mi stato de salute, qual verifica pote esser melior que un belle promenada a -20 grados?

Le quantitate de nive in le stratas es notabile

Le decision de promenar me un poco esseva causate per le bellissime die — le nordicos sape appreciar le raritate de un die de sol!

Vista de Ruoholahti, con le camino de Helsingin Energia

Benque le temperatura esseva de -20 grados, io non sentiva multo frigido, durante que io esseva inter le centro habitate.

Anque io habeva un bonetto de nive sur mi capite ;-)

Le zona proxime al mar esseva plus ventose, e photographar deveniva plus difficile, perque le digitos perdeva lor sensibilitate quasi instantaneemente.

Finalmente un sede ubi reposar...

Le metereologos previde un grande precipitation de nive iste vespere/nocte. Ubi va nos poner tote iste nive?

Nive in Helsinki

Nive in Helsinki, originally uploaded by mardy78.

Iste hiberno ha marcate un record per le quantitate de nive cadite in Helsinki. In decembre le sito de YLE (le principal medio de information televisive in Finlandia) reportava que le 2009 esseva le anno con plus de nive in le sud del Finlandia, desde le 1966.

Le photo monstra un placia que es frequentemente nettate del nive: le nive es temporaneemente ammassate in un parte del placia, e postea transportate in altere locos. Recentemente le novas reportava que le locos de discarga del nive non pote plus reciper altere nive, e on considera le possibilitate de jectar le nive in le mar.

Fortunatemente le pistas pedonal es nettate.

Le nettatores creava un passage anque pro le ingresso a mi casa.

Iste photo esseva prendite le 10 de januario, quando le temperaturas esseva multo plus basse (nunc il ha circa -5 grados), e le pruina (it: brina, en: frost) se formava sur le arbores e produceva un panorama exceptionalmente blanc.

Le placer de zoomar le mappa in MaemoMapper

Desde le initio del nove anno, io non ha habite multe tempore pro laborar super maemo-mapper; ma finalmente, hodie le cosas cambiava e io poteva dedicar me al programmation extreme!
Le resultato es que ora le zoom in maemo-mapper es animate:

Le centro del zoom es le citate Kalmar (clicca sur le nomine pro leger plus e vider alicun photos), in Svedia, ubi iste estate il habera le incontro nordic de interlingua, al qual totes es invitate a participar.

In conclusion, isto esseva un articulo duplemente propagandistic. :-)

Nota: le centro del zoom es fixate in Kalmar solmente in le video. Benque io considerava le idea de centrar le mappa in maemo-mapper sempre in Kalmar pro propagandar le incontro nordic, io decideva de non facer lo perque io es, pro mi mal sorte, troppo bon.