ia: Salute! Lo que seque es le archivo de mi vetule blog. Io continua mi blog hic.
it: Ciao! In basso trovate l'archivio del mio vecchio blog. I post più recenti sono qui.
en: Hi! What follows are the archives of my old blog. My recent posts are here.
Old posts
-
Cambio de sito
Io ha decidite de cambiar le motor usate pro generar mi blog: ora illo es blogger.com. Le adresse del sito remane le mesme, ma alicun ligamines poterea non functionar.
Io suppone que necuno va leger iste message; ma si pro hazardo tu lo lege, rememora que le adresse principal es http://www.mardy.it.
Si tu recipe iste message per RSS, per favor renova le sorgente per visitar le pagina web del sito.
-
Promenada de septembre
Le fin de septimana passate, in compania de Yulia qui veniva a visitar me, io profitava del belle die pro exir del casa. Nos non habeva un plano precise: sia io sia Yulia ha jam visitate tote le locos que on pote visitar con un breve promenada a pedes de mi casa, e anque tote le locos turistic proxime a Helsinki que io cognosce. Alora, nos decideva de vader al station central e prender un traino qualcunque, le prime que partiva, e stoppar al ultime station que se trova in le area urban de Helsinki (de maniera que nos non pagarea le ticket :-) ), e se haberea promenate un poco in le proximitates — que probabilemente non haberea offerite un panorama multo differente del usual, ma le importante esseva mover se.
Le prime traino que partiva esseva directe a Vantaankoski, e le ultime station pro le qual nostre ticket esseva valide esseva Malminkartano; assi nos saliva in le traino e tosto arrivava al destination. Infortunatemente le tempore esseva multo ventose, e quando nos arrivava a Malminkartano le sol habeva disparite sub le nubes, e alicun guttas de pluvia initiava a cader. Nos decideva de promenar se comocunque, e prendeva un sentiero que entrava in le boscos. Pro esser completemente honeste, io debe dicer que normalmente io non me promenarea in un citate — e ancora minus in un bosco! — que io non cognosce sin un mappa o un guida, especialmente si il pluvia e il manca punctos de referimento. Lo que compensava iste difficultates esseva mi filio, le N810, cuje navigator GPS traciava in le schermo le via que nos percurreva; assi il es multo facile retornar al puncto de partentia, simplemente per sequer al inverso le via initial.
Durante que nos esseva in le bosco, le conditiones atmospheric se deteriorava ancora un poco, e il habeva un poco de pluvia e le celo esseva multo obscur. Ma jam quando nos exiva del boscos, le nubes habeva passate e se dirigeva verso Helsinki. Le photo del strata humide esseva facite in ille momento, e illo evidentia le contrasto del fronte del nubes que se parti.
Un altere cosa que immediatemente habeva capturate nostre attention si tosto que nos non esseva plus circumdate per le arbores esseva un collina, que pareva multo alte e ripide. Ma quando nos esseva plus proxime a illo, nos observava que illo esseva solmente un collinetta, e que le altessa esseva solmente un illusion causate per le facto que illo es totalmente immerse in le pianura: illo se erge quasi como un pyramide, e il ha nulle altere elevation in le vicinitate. Nos non esseva fatigate, e le retorno del sol nos incoragiava a vader verso le summitate. Curiosemente, pro salir le collina il habeva, in ultra a sentieros non ripide, un rampa de scalas de ligno que vadeva directemente in alto. Ante interprender le scalata, nos considerava le longessa del rampa de scalas e concludeva que illo consisteva de circa 150 passos: un cifra decisemente non obstaculante, e alora nos confirmava nostre intention de salir, e vadeva. Yulia contava mentalmente le passos, e quando nos nos fermava pro facer un breve pausa, illos esseva pauco plus que 100; nos reguardava in alto, e videva que si, le summitate esseva plus proxime, ma non tanto proxime quanto 50 passos — alicun plus. Nos reprendeva le scalata, e post un altere pausa, nos arrivava al summitate. Yulia habeva contate 426 passos.
In le summitate il habeva alicun pancas pro seder, e alicun anemoscopios colorate que indicava le direction del vento. Illos me recordava del tentaculos del videojoco Day of the tentacle, ma isto es un inciso que vos pote oblidar. Le vista del summitate offereva un panorama a 360 grados; nulle cosa, excepto le impuritate del aere que obfuscava le horisonte, obstaculava le vision. Io prendeva alicun photos del panorama, que totevia non es exceptional: partialmente a causa de mi incapacitate, e partialmente a causa del facto que le panorama esseva totalmente plan e monotone.
Quando nos decideva de retornar a basso, nos notava que in le ultime passo del scala (illo in le summitate) il habeva un scripto: 426. Assi Yulia discoperiva de haber facite un effortio inutile in contar le passos, ma anque esseva orgoliose del facto que illa sape contar — especialmente le cosas utile.
Tote le photos es in le galleria; le primes esseva prendite le die precedente, in Lauttasaari e in le insula immediatemente a nord de illo. Un cosa notabile es que in le meta-informationes del photos il ha le indication (latitude e longitudine) de ubi le photo esseva prendite; isto esseva possibile gratias a gpscorrelate, un simple programma que combina le datos GPS (que consiste de coordinatas spatial e temporal) con le tempore del creation del photos, per interpolation. Assi il es possibile recordar non solmente le data e le ora, ma anque le loco ubi le photo esseva prendite. Io ha cargate alicun del photos anque in mi galleria in flickr, que pote visualisar le photos in le mappa: e quando on clicca sur un photo, il ha un ligamine que permitte de mappar le photo. Iste informationes es inseribile anque manualmente — ma homines moderne utilisa instrumentos moderne. ;-)
Como nota de clausura, io ha modificate le configuration de mi galleria assi que le albums es ordinate per data de ultime modifica: illos plus nove appare al initio, in maniera que si uno visita le galleria ille pote immediatemente vider ubi es le nove contento. E ille es contente.
-
Photos del vacantias estive
Vostre patientia ha essite premiate! In le improbabile caso que vos ancora controla iste sito in le sperantia de vider le photos de mi vacantias, que io ha promittite desde tempores immemorabile, ben, ecce a vos un altere demonstration de mi abilitate in mantener le promissas!
Io ha cargate le photos del duo septimanas que io ha passate in Sancte Petroburgo (e localitates proxime) al initio de augusto hic, in le galleria. Io los ha dividite in plure album-es (circa un album per die), e in cata album il ha un sub-album que se appella “Personal”, protegite per contrasigno — si vos non cognosce le contrasigno, per favor contacta me e sia preste a versar un amonta considerabile de moneta pro obtener lo.
Il non esseva facile seliger un photo pro iste articulo, ma al fin io ha decidite que iste “estufa del nive” (nota le skis pro skiar sur le nive, in hiberno) es le plus belle e representative — ma si vos trova photos melior, dice me!
Confidente que io ha plenate vostre tempore libere, io lassa le parola al photos (si alicuno crede que io va commentar e describer los, lassa me dicer que io ha cargate Santa Claus de isto).
-
Le reporto de Transparency International
Transparency Internation ha publicate le tabula del “Indice de Perception de Corruction” (CPI, in anglese Corruption Perception Index), que mesura le grado de corruption del officieros e del politicos, derivate per un quantitate de fontes differente.
Iste anno, le situation de Finlandia e Italia se ha pejorate; Finlandia ha passate del prime placia que illo teneva in le 2007, a un misere e vergoniose quinte position, durante que Italia ha precipitate del 41me al 55me placia, que es comocunque un position dignitose pro un pais como le nostre.
Secundo le studio, paises como Botswana, Oman, Bahrain e Bhutan, que io vos defia a locar exactemente in un mappa geographic sin nomines, es minus corrupte que Italia; ma iste studio es obviemente non veritabile, perque illo es in total contrasto con le facto que nulle citatano italian cognosce alicun persona que ha essite effectivemente in prison a causa de corruption!
Ma pro le credulones, ecce le tabulas pro le 2007 e pro le 2008
-
Napoli retorna in Oriente
In un articulo in le magazin Il Giornale del 19 julio 2008, nostre amatissime prime ministro Silvio Berlusconi annuncia “Io ha reportate Napoli in le Occidente”, pro significar que ille habeva solvite le emergentia del immunditias que desde plure menses (o annos) affligeva le citate. Le problema ha essite “solvite” per portar le immunditias foras del citate e arder los in le periferia, in locos distante del oculos del populo; e impedir omne manifestation de opinion contrari, in violation del articulo 21 del constitution (que nostre politicos non cognosce, ma necuno es perfecte). E finalmente il es un nova de iste dies, que Napoli ha ancora abandonate le Occidente:
E illes qui sperava in le establimento del recolta differentiate del immunditias ha essite ancora deluse…
P.S.: Si, io sape que io debe ancora publicar le photos de mi vacantias in Sancte Petroburgo! Ma attende, le patientia es le virtute del fortes! (ma io non dice que io va portar Sancte Petroburgo in Occidente…)
-
Incontro nordic
Le incontro nordic de interlingua es un evento biennal que ha loco in un pais scandinave, usualmente in Svedia viste que le costo del vita non es exaggeratemente alte e que il ha plus interlinguistas active. Io participava nonobstante que io non es propriemente un nordico, e trovava que io non esseva le sol participante abusive del gruppo: il habeva altere spiones de Germania, Hungaria, Francia, Grande Britannia e, curiosemente, Japon.
Isto non esseva exactemente un conferentia, ma un reunion; in le prime tres dies il habeva cursos de interlingua pro comenciantes e cursos avantiate, que non faceva parte del incontro nordic ma esseva realisate pro facilitar le participation de tote interessatos, e pro unir duo eventos in le mesme occasion. Officialmente, le incontro durava solmente duo dies, initiante le postmeridie de venerdi e terminante le postmeridie de dominica. Io arrivava jovedi, in le tarde nocte pro causas que io non va repeter, e ergo non participava al cursos de interlingua (isto explica perque io scribe tanto mal). Ma io poteva facer multe altere cosas interessante, per exemplo
mangiar fructos que se trovava in abundantia, visitar le universitate de matematica
e notar como iste studentes debe observar le regulationes le plus stricte e tyrannic,
spiar le organisatores durante que illes confabula,
o personas qui roba preciosissime libros in interlingua,
o curre pro facer un photo de gruppo con le tempore contate,
visitar villages phantasma, e pro finir
esser spectator de un concurso sportive pro conilios. Sin oblidar altere evenimentos importantissime, qual le intervista a me per parte de Peter Kovacs que ha revivificate Radio Interlingua, le bon surprisa de Ingvar Stenström (un del veteranos — o melio, juvene veteranos — de interlingua) quando on le ha conseniate un copia de su libro in anteprima (le libro es probabilemente in phase de publication in iste dies), e altere cosas plus o minus interessante que vos pote certemente trovar si vos visita le galleria.
-
Poste Italiane: servicio de fama international
Iste vespere io curiosava in Ebay, inter le multitude de offertas de objectivos photographic, sin un particular idea. Mi interesse esseva captivate per alicun lentes Zenitar, in quanto Made in Russia, e immediatemente io cliccava pro satisfacer mi curiositate e vider le detalios del offerta. Le venditor es un boteca electronic de Moskva, e quasi tote le material que illes ha es manufacite in Russia. Ma io sape que vos non es interessate in isto. Le ration pro le qual iste offerta es tanto interessante pro me (e le ration pro le qual io scribe iste lineas in loco de vader a dormir) es un nota in grande characteres rubie que es presente in tote le insertiones de iste venditor:
Sin emphatisar le errores grammatical del nota, io lo traduce pro illes qui non comprende anglese: “Attention! Nos non face expeditiones a Italia. Il ha grande retardos e multe paccos ha essite perdite. Tote le compras per compratores italian essera cancellate. Nos spera que vos comprendara”. Io memora que ante alicun tempore io trovava annuncios simile in Ebay, ubi on diceva que on non expediva a Italia e China. Ma ora, nos ha remanite sol. Le sol pais in le mundo al qual le russos non invia paccos es Italia, perque nostre servicio postal non es considerate efficiente e digne de confidentia. Isto pote apparer sensational pro illes qui non ha vivite in Italia; ma pro nos, ubi es le surprisa?
-
Il cannocchiale
Io me ha inscribite al sito il cannocchiale, e mi pagina es http://mardy.ilcannocchiale.it. Isto es un sito de social networking italian, pro dar major visibilitate a blogs personal; le contento de mardy.it essera aggregate in in ilcannocchiale.it — ma mi fidelissime lectores continuara a sequer me in mardy.it, que va remaner mi sito primari.
-
Salutos de Linköping
Io es currentemente in Linköping, le citate del Svedia que ha essite seligite como sito pro le incontro nordic de interlingua. Si, apparentemente io anque ha devenite un nordico — le cosa me disturba un poco, ma le dolor es tolerabile. Le incontro termina dominica, ma pro vider alicun photos de illo vos debera attender plus tempore, nam mi vacationes va durar tres septimanas (ma io non va ancora revelar qual es le destination successive, pro crear suspance). Io spera que le volo de retorno de Linköping essera minus travaliate que illo de vadita: illo esseva retardate de cinque minutas, postea de dece, postea de ancora cinque minutas, postea illo esseva cancellate e nos esseva promittite un solution alternative, infin (o quasi) illo esseva restaurate e schedulate pro le vespere, ma tosto retardate ancora, e finalmente (io promitte que isto es le fin) illo partiva a 21:15, con un retardo de quasi cinque horas in respoecto al schedulation originari. Ma io es patiente.
-
Pin Ion
Pin Ion es un banda finlandese qui sona musica rock. Io cognosce le cantante del gruppo, H-P (istos es le initiales del nomine, que remane un secreto non revelabile), que es anque le marito del arrangiator artistic de nostre gruppo theatral. Heri le cinque pinniones sonava in le bar Texas, que nonobstante le nomine se trova in le centro de Helsinki, e io vadeva con alicun amicos a audir lor musica. Alicun cantos esseva in finlandese, ma le major parte esseva in anglese; totevia isto non significa que io poteva comprender lor texto, que esseva difficilemente audibile (ma isto es un “problema” commun al cantos rock, especialmente quando illos es sonate a alte volume in un parve local). Ma le musicas esseva appreciabile e postea audir los in le bar io ha discargate alicun mp3-es del mesme cantos del sito del Pin Ion-es e los trova multo belle.
Io ha prendite le occasion pro facer alicun photos del evento, que vos pote “admirar” in le galleria.
subscribe via RSS