Recepta del crostata de piras

Le arbores del dacia produceva multe piras iste anno, e infortunatemente illos non se conserva ben pro un longe tempore. Alora, pro non lassar los guastar, io decideva de utilisar los pro facer crostatas, un dulce que me place multo, ma que io nunquam ha cocinate. Ben, il ha un prime vice pro toto.

Le recepta del crostata de piras

Io trovava un recepta pro le crostata de pomos in internet, e lo adaptava un poco.

Ingredientes

• 300 grammas de farina
• 140 grammas de sucro
• 1 parve coclear de levatura (it: lievito, en: yeast)
• 2 ovos (on usa uno complete, e un vitello del altere)
• 100 grammas de butiro
• 1 coclear de oleo de tornasol (it: girasole, en: sunflower)
• 500 grammas de piras a peciettas

Preparation

On pone le farina, le sucro e le levatura in un salatiera (o altere contenitor bastante ample pro poter laborar le impasto con le manos), e on los misce con un coclear. Postea on adde le oleo e le butiro, taliate a pecias (le dimension non importa). On labora con le digitos del mano, usque quando le butiro se ha reducite in partes plus parve, e le impasto ha acquirite un consistentia granulose. Alora on adde le ovo e le vitello (isto es le parte jalne central) del altere ovo (le resto del secunde ovo on non va utilisar lo), e on misce e impasta con le manos, fin a quando le massa non plus es collose (le manos resta munde quando on lo labora).

A iste puncto on inveloppa le impasto in un pellicula transparente (o lo pone in un sacchetto pro alimentos) e on lo pone in le refrigerator (non in le congelator!), ubi illo debe reposar pro al minus 30 minutas. Intertanto, vos non va reposar: vos debe taliar le piras in parve partes, usque le peso del fructa arriva a circa 500 grammas.

Quando vos ha finite (ma non prima que 30 minutas ha passate!), on recupera le massa del refrigerator e on remove un tertio o un quarto de illo, que essera utilisate postea. Le parte le plus grande on va poner sur un folio de carta pro furno, e on lo extende in un forma approximatemente circular, del spissor de circa 4 millimetros. Le diametro debera esser sufficiente pro coperir tote le fundo del tortiera, plus 2 centimetros pro le bordos del torta. Post que le impasto es in le tortiera, on face alicun foros con le puntas de un furchetta (non demanda a me le ration — io non lo sape!), e on versa le fructa. Alora, on prende le parte del impasto que on removeva precedentemente, e on lo extende e talia in bandas de un centimetro o poco plus de largor, que on pone super le strato de fructa pro formar le texitura a quadrettos.

In fin, on pone le tortiera in le furno, a 150 grados de calor, pro circa 40 minutas.

Variantes

In vice que piras, on pote obviemente utilisar un altere fructo de vostre gradimento; si le fructo es dulce, alora il poterea esser un bon idea adder succo de lemon — isto es particularmente consiliate con le pomos, anque pro evitar que illos deveni nigre.

Bon appetito!