Mardy

-20

noreply@blogger.com (Mardy) — Sat, 20 Feb 2010 14:10:00 +0000

Io ha passate un septimana in casa, a causa del influentia. Finalmente, mi condition ha initiate ameliorar se durante le ultime dies, e benque io ha ancora alicun symptomas residual, io me senti multo plus ben.

Ma pro haber un mesura plus scientific super mi stato de salute, qual verifica pote esser melior que un belle promenada a -20 grados?

Le quantitate de nive in le stratas es notabile

Le decision de promenar me un poco esseva causate per le bellissime die — le nordicos sape appreciar le raritate de un die de sol!

Vista de Ruoholahti, con le camino de Helsingin Energia

Benque le temperatura esseva de -20 grados, io non sentiva multo frigido, durante que io esseva inter le centro habitate.

Anque io habeva un bonetto de nive sur mi capite ;-)

Le zona proxime al mar esseva plus ventose, e photographar deveniva plus difficile, perque le digitos perdeva lor sensibilitate quasi instantaneemente.

Finalmente un sede ubi reposar...

Le metereologos previde un grande precipitation de nive iste vespere/nocte. Ubi va nos poner tote iste nive?

Nive in Helsinki

noreply@blogger.com (Mardy) — Fri, 05 Feb 2010 20:28:00 +0000

Nive in Helsinki, originally uploaded by mardy78.

Iste hiberno ha marcate un record per le quantitate de nive cadite in Helsinki. In decembre le sito de YLE (le principal medio de information televisive in Finlandia) reportava que le 2009 esseva le anno con plus de nive in le sud del Finlandia, desde le 1966.

Le photo monstra un placia que es frequentemente nettate del nive: le nive es temporaneemente ammassate in un parte del placia, e postea transportate in altere locos. Recentemente le novas reportava que le locos de discarga del nive non pote plus reciper altere nive, e on considera le possibilitate de jectar le nive in le mar.

Fortunatemente le pistas pedonal es nettate.

Le nettatores creava un passage anque pro le ingresso a mi casa.

Iste photo esseva prendite le 10 de januario, quando le temperaturas esseva multo plus basse (nunc il ha circa -5 grados), e le pruina (it: brina, en: frost) se formava sur le arbores e produceva un panorama exceptionalmente blanc.

Le placer de zoomar le mappa in MaemoMapper

noreply@blogger.com (Mardy) — Sat, 16 Jan 2010 15:13:00 +0000

Desde le initio del nove anno, io non ha habite multe tempore pro laborar super maemo-mapper; ma finalmente, hodie le cosas cambiava e io poteva dedicar me al programmation extreme!
Le resultato es que ora le zoom in maemo-mapper es animate:

Le centro del zoom es le citate Kalmar (clicca sur le nomine pro leger plus e vider alicun photos), in Svedia, ubi iste estate il habera le incontro nordic de interlingua, al qual totes es invitate a participar.

In conclusion, isto esseva un articulo duplemente propagandistic. :-)

Nota: le centro del zoom es fixate in Kalmar solmente in le video. Benque io considerava le idea de centrar le mappa in maemo-mapper sempre in Kalmar pro propagandar le incontro nordic, io decideva de non facer lo perque io es, pro mi mal sorte, troppo bon.

Bon 2009 (lo que resta de illo)!

noreply@blogger.com (Mardy) — Wed, 30 Dec 2009 17:28:00 +0000

Al initio de iste anno io oblidava de augurar un bon anno a mi lectores, probabilemente con consequentias catastrophic. Alora, ante que il es troppo tarde, io vos augura un felice anno 2009, assi que al minus le fin del anno pote esser prosperose.
Io accompania mi augurios con un photo de un homine primitive del aspecto menaciose, ma de bon anima. Le photo esseva prendite alicun dies retro, in Russia, in un дача (pron. "dacha"). Le homine habeva justo passate plure minutas in un баня (pron. "bania", isto es le sauna russe) e su corpore esseva sufficientemente calide pro permitter le de promenar se sur le nive in cerca de alimentos.
Post haber trovate los, le homine retornava in su caverna.

Le N900 arriva. Anque in vostre manos?

noreply@blogger.com (Mardy) — Tue, 17 Nov 2009 19:57:00 +0000

Mi N900. Un observator acute poterea vider que io pote communicar con le contacto selectionate (a proposito, qui es ille?) non solmente per telephono, ma anque per Google-talk, Jabber e Skype.

Un septimana retro Olli-Pekka Kallasvuo (le administrator executive de Nokia) annunciava al pressa que le distribution del N900 habeva finalmente initiate. Post un septimana, il pare que ancora nulle persona ha succedite in trovar le telephono in un boteca, ma on pote dicer que il es solmente question de horas. Intertanto, on pote discoperir quanto grande es le expectation simplemente per facer un recerca de N900 in twitter e contar quante messages il ha! Infortunatemente non tote illes qui commenta vadera al botecas a comprar lo, alteremente io esserea millionario.

Del resto, io ha nihil special a dicer; io soltanto debeva scriber alicun cosa, perque vos non pensa que io ha disparite completemente. :-)

Autumno. O forsan hiberno.

noreply@blogger.com (Mardy) — Thu, 15 Oct 2009 21:13:00 +0000

DSC04703.JPG, originally uploaded by mardy78.

Iste photo esseva prendite sabbato 10 octobre. Duo dies postea, il faceva nive. Le nive non durava, perque le temperatura se altiava immediatemente, e de facto io non mesmo lo videva perque io stava claudite in le officio — ma alteres me reportava que le prime nive arrivava.
Nunc le temperatura varia inter 0 e 10 grados: le longe hiberno es al portas!

Il fatto quotidiano

noreply@blogger.com (Mardy) — Sat, 19 Sep 2009 06:24:00 +0000

“Il fatto quotidiano” es un nove jornal que apparera in le botecas italian le 23 de septembre. Finalmente anque in Italia il habera un jornal de information comparabile con le jornales estranier, e non submittite al voluntate del classe/mafia politic — o al minus on lo spera. Le nove jornal essera redigite per jornalistas de differente orientamentos politic (o de nulle orientamento), accomunate per le desiro de diffunder un information independente. Contrarimente al resto del jornales italian, Il fatto quotidiano non recipera ulle subvention monetari del stato.

Pro informationes super le abonamento, insimul a un pre-vista del jornal, se trova in le sito antefatto.it. Il es un facto curiose e significative, que le abonatos es jam plus que 20000; iste abonatos (io anque es inter illes) ha pagate le jornal in avantia, sin vider le jornal e ergo sin ulle garantia que illo va placer les.
Io me ha abonate al version electronic in PDF, ma il es anque possibile abonar se al version sur papiro.

Hic il ha un video de un incontro de presentation del jornal. De facto io ha positionate le video al parte final, ubi on non parla de Il fatto quotidiano ma de Papi, le plus recente libro scribite per Peter Gomez, Marco Lillo e Marco Travaglio. Il ha alicun notas humoristic, pro illes qui pote comprender le italiano e sape qual es le situation del information in Italia:

In anticipation de maemo-mapper pro fremantle

noreply@blogger.com (Mardy) — Tue, 08 Sep 2009 15:37:00 +0000

Pro incoragiar le contributiones al developpamento de maemo-mapper, io ha publicate in le repositorio git de maemo-mapper mi modificationes que permitte de executar maemo-mapper in le N900. Nota que isto es le minimo del modificationes necessari pro executar le programma, e non del toto le version final: le interfacie graphic es ancora inusabile sin le stylus (con le exception del dialogo de configuration, que es quasi totalmente revidite), e in particular on non debe usar maemo-mapper a plen schermo (fullscreen), perque alteremente on non plus pote reverter al modalitate normal, non mesmo post restartar lo!.

Si ancora il ha alicuno interessate in probar iste version pre-pre-pre-alpha, on pote obtener le archivo maemo-mapper_2.6.2_armel.deb preparate per me o on pote obtener le codice sorgente con iste commandos (a executar in un session de scratchbox in le target FREMANTLE_ARMEL):

git clone https://git.maemo.org/projects/maemo-mapper
cd maemo-mapper
git checkout origin/fremantle
dpkg-buildpackage -rfakeroot -b

Si le compilation succede, vos trovara le archivo maemo-mapper_2.6.2_armel.deb in le directorio parente, e de ibi vos lo pote copiar al N900 e installar con dpkg -i <location del archivo>. Post facer isto, vos trovara maemo-mapper in le menu del applicationes (e alora, bon fortuna! :-p).

In addition, io es felice de annunciar que finalmente le librerias clutter e clutter-gtk es disponibile in le repositorio extras-devel de maemo fremantle.

Maemitate

noreply@blogger.com (Mardy) — Sat, 05 Sep 2009 13:27:00 +0000

Le annuncio del N900 ha essite recipite con grande enthusiasmo per le pressa e per le appassionatos de technologia mobile, e ha generate un multitude de commentarios e recensiones in internet.
Ma que dicera le usatores del precedente productos del linea Maemo, quando illes videra que il non ha le programma maemo-mapper? (isto es le programma que io usa in mi N810 pro le geotagging — e a vices anque pro non perder le via!) Certemente le presentia del programma Ovi Maps pre-installate in le N900 va rassecurar le viagiatores e donar les un experientia unic de navigation, ma le usatores habituate a maemo-mapper, sia technicamente sia sentimentalmente, poterea sufferer le absentia de lor programma preferite.

Pro isto, io ha decidite de portar maemo-mapper al nove version de maemo (appellate in codice fremantle) assi que illo pote functionar in le N900. Le processo de conversion esseva simple e in minus que un hora io jam obteneva le prime successo:

Totevia il ha multe cosas a cambiar ante que le maemo-mapper es preste pro le distribution: tote le interfacie graphic debe esser renovate pro esser usabile con le touchscreen sin le necessitate de usar le stylus, e iste operation va prender multe tempore. Un altere cosa que io vole facer es utilisar le motor 3D del N900 pro accelerar alicun operationes graphic, como le rotation e le zoom del mappa. Pro utilisar le 3D io ha decidite de utilisar le librerias clutter e clutter-gtk, que totevia non es pre-installate in le N900. Pro isto, io ha recentemente portate iste librerias a maemo fremantle, e sperabilemente in alicun dies illos pote esser a disposition anque de altere programmatores qui volerea utilisar los. Io reportara novas super mi progressos in iste blog — sia patiente! ;-)

Party pro N900

noreply@blogger.com (Mardy) — Thu, 27 Aug 2009 16:32:00 +0000

Que nos celebra le annuncio public del N900, le nove "smartphone" de Nokia que es construite super maemo, que in torno es basate super Linux.

Vide le sito official: maemo.nokia.com.

Signales de vita

noreply@blogger.com (Mardy) — Sat, 22 Aug 2009 06:33:00 +0000

Post que alicun persona observava que iste blog ha essite completemente silente desde longe tempore, il es opportun que io scribe al minus un breve texto pro communicar al mundo del internet que io es ancora vive. Le mense passate ha essite multo plen de activitates diverse, e un poco pro manco de tempore e un poco pro pigressa, io non succedeva in actualisar le blog.

Ante toto, io vole signalar que mi fratre ha devenite patre pro le secunde vice, assi ille es un bi-patre. Congratulationes a ille e specialmente al matre!

Quanto a me, al fin de Julio io partecipava al conferentia international de interlingua in Kirchheimbolanden, Germania, que probabilemente esseva le conferentia le plus belle del ultime 20 annos (a sentir le opiniones de illes qui participava a multe conferentias passate); ben que numericamente nos non esseva multe, le climate social esseva splendente. Il ha multe momentos que io rememora con placer, e alicun de illes io capturava per photo:

Un session de hypnotherapia

Le promenada in Kirchheimbolanden

Le vista del celo balu de iste photo me recorda de un cosa que me ha impressionate durante iste viage: le presentia de multe generatores a energia eolic. Quando nos vadeva per le traino, io observava que il habeva multe e multe molinos eolic super le collinettas in le campanias. Io non trova que illos disturba le panorama, o comocunque non plus que un casa o un campo cultivate. E io es secur que le aves apprendera a evitar de batter contra los. :-)

Nos anque habeva un visita al citate roman de Mainz, ubi anque nos habeva le permission de facer un demonstration in un del placias principal.

Le decorationes del casas de Mainz

Propaganda pro interlingua

In le tradition del conferentias de interlingua, il habeva seratas con cantos e in le ultime vespere il habeva anque alicun recitationes amusante.

Un jornalista de un television multo estranier

Le totalitate del photos que io prendeva al conferentia es visibile in le album del photos del conferentia in le galleria (il ha multe photos, habe patientia!). Io anque recordava plure videos, ma io ancora non los ha publicate — io va facer lo tosto, crede a me ☺. Intertanto, vos pote reguardar e admirar le video del intervista del professor Ranto Espe (un famose luminar del scientia) al linguista Rico Porto, de nationalitate incerte:

Qual follia!

Campiones in Kamppi

noreply@blogger.com (Mardy) — Fri, 10 Jul 2009 17:56:00 +0000

dsc01227.jpg, originally uploaded by mardy78.

Circa un septimana retro io observava (ben, de facto il esseva impossibile non observar lo!) que le placia de Kamppi habeva essite transformate in un campo de football: un belle area rectangular de herba artificial lo coperiva.

E ante heri, passante proxime al placia, vostre acute observator ancora observava que il habeva un joco de football in curso: duo equipas de infantes se confrontava in un appassionatissime duello. Tanto emotionante, que io lo reguardava pro un minuta, justo le tempore pro prender le photo de un goal, e me promenava via.

Le expression del infantes demonstra quanto importante le match esseva pro illes. :-)

Opiniones

noreply@blogger.com (Mardy) — Sun, 05 Jul 2009 16:09:00 +0000

Opiniones, originally uploaded by mardy78.

Circa duo septimanas retro Union del Humanistas e le Union del Pensatores Libere finlandese applicava lor propaganda atheista (o agnostic) sur le autobuses de Helsinki, sequente le exemplo de simile organisationes in altere citates. Io ha perdite le occasion de photographar iste autobuses (le propaganda ha justo finite), ma vos pote leger un nova correlate in le sito del principal television finlandese, YLE.
Le texto, que esseva scribite in finlandese, diceva “Deo forsan non existe. Ora cessa de preoccupar te e gaude del vita.”.

Heri io videva un replica sympathic, scribite a grande characteres sur un boteca de libros christian: “De facto, Deo existe. Simplemente demanda al autista.”.

Un altere session de photos

noreply@blogger.com (Mardy) — Tue, 30 Jun 2009 18:56:00 +0000

Clicca sur le imagine pro vider altere photos del session.

Anastasia, un couchsurfer de Russia, gentilmente se posava ante le objectivo de mi photocamera. Le povre tourista certo non imaginava que illa haberea essite tanto photographate!
Le photos de facto esseva prendite quasi 20 dies retro, ma post que io non ha novas importante a scriber, io decideva de plenar le vacuitate del blog con iste album. Io es secur que vos apprecia. :-)

Reclaim the streets

noreply@blogger.com (Mardy) — Thu, 18 Jun 2009 14:23:00 +0000

Io incontrava iste signo quando io retornava a casa in le postmeridie de sabbato. Retro al signo, il habeva multe juvenes, alicunes sedeva sur le strata e habeva un sorta de pic-nic, alteres dansava al musica producite per potente apparatos phonic. Io non sapeva que esseva iste evento, ma illo pareva ben organisate.

Retornate a casa, io cercava informationes super iste evento in le internet, e trovava un explication in wikipedia. Le idea me place.

Helsinki Samba Carnaval

noreply@blogger.com (Mardy) — Wed, 17 Jun 2009 18:55:00 +0000

Reguarda iste graphico, que representa le numero de accessos in mi conto in flickr:

Que ha evenite in le ultime duo dies, que le accessos ha devenite improvisemente tanto numerose? Le explication es que le graphico conta le numero de photos que esseva vidite, e non le personas: assi, si un persona reguarda 100 photos, le graphico se incrementa de 100. E si on carga 286 photos, e tres visitatores reguarda cata photo, le contator sali de 858!

De facto, duo dies retro io cargava 286 photos, que io prendeva sabbato postmeridie in occasion del “Samba Carnaval”: multe dansatores de Samba defilava in le vias del centro de Helsinki (Aleksanterinkatu e Esplanadi), accompaniate per musica e carros colorate. Si vos vole incrementar ancora le contator del accessos, visita le album Helsinki Samba Carnaval!

Electiones

noreply@blogger.com (Mardy) — Mon, 01 Jun 2009 16:41:00 +0000

Le electiones pro le parlamento europee essera tenite inter le 4 e 7 de junio. In Finlandia il es jam possibile votar ora, in tote le officios postal; le problema es que io non cognosce le candidatos finlandese e non ha ancora decidite pro qui votar. Como in occasion del electiones municipal, le sito vaalikone.fi presenta un serie de questiones que permitte al elector de discoperir qual es le candidato qui melio representa su ideas. Infortunatemente tote le questiones in le sito es in finlandese, e io non ha ancora decidite si mi motivationes es sufficiente pro stimular me a traducer los.

Ma io ha trovate que il ha anque un altere sito simile, que es usabile de omne nation e in omne lingua: euprofiler.eu. Quando on entra in le sito on debe scriber in qual nation on va votar, e qual lingua on vole usar; postea on debe selectionar le responsas a 30 questiones super varie themas (alicun questiones es specific pro le nation) e al fin on obtene alicun statisticas que monstra qual es le partitos (non le candidatos, infortunatemente) le plus simile a proprie ideas.

Le lectores qui va votar in Italia non deberea usar iste sito, perque on sape que multe politicos italian dice un cosa e face le exacte opposite; pro le italianos, le unic possibilitate de exir del miseria, del corruption, del racismo, del dictatura politic e mediatic, del derision international, del falsitate e de multe altre males es votar pro le partito Italia dei Valori.

Estate finlandese

noreply@blogger.com (Mardy) — Sun, 31 May 2009 14:28:00 +0000

Le estate ha arrivate. Hodie e heri le temperatura esseva circa 25 grados, le celo esseva blau, sin nubes, e le sol splendeva super Helsinki. Con le amicos del theatro, io habeva un picnic in Suomenlinna. Le sol rostiva mi pelle mediterranee, que non es usate a un sol tanto forte.

Io photographava un laro que volava super le campo del picnics a cercar nutrimento (nota su expression seriose e concentratissime):

Nota que le angulos del photo es plus scur que le centro. Qui sape perque?

Infortunatemente le estate finlandese non es multo longe. De facto, illo jam es quasi finite:

Tosto il va cader nive.

Exercitios de schola

noreply@blogger.com (Mardy) — Sat, 23 May 2009 18:23:00 +0000

Strobist es un blog multo popular inter le aspirante photographos, e probabilemente anque inter professionistas. Illo describe technicas de utilisation del flash photographic: le termino strobist, que in interlingua on traducerea con “strobista”, indica le persona que usa le strobe, que in anglese on usa impropriemente pro appellar le flash. In le sito il ha un curso, a iste adresse, que tracta varie aspectos del illumination, e come controlar lo. Como tote le cursos respectabile, iste curso comprende anque alicun exercitios, que consiste in prender alicun photos con determinate characteristicas, e publicar los (in flickr).

Como tote le studentes respectabile, io anque face le exercitios. Le exercitio del qual io presenta mi solution es describite in iste pagina (in anglese), e io lo traduce pro vostre commoditate:

le assignation es photographar uno o plus utensiles de cocina — - cultellos, forchettas, cocleares, mixatores — qualcunque cosa vos vole. Le aspecto que on cerca es lo de un objecto ordinari elevate a arte pur. O al minus a arte commercial, como de un cosa que poterea apparer como copertura de un catalogo o in un calendario o in un pariete de un del commun "fast casual" restaurantes.

Mi tentativas de solution es in iste pagina de flickr. Mi preferite es lo que io ha mostrate in iste articulo, ma il esserea interessante de leger anque vostre opiniones, si vos ha alicun. ;-)

Diffusor

noreply@blogger.com (Mardy) — Sun, 17 May 2009 16:05:00 +0000

Plus pro delecto que pro necessitate, io ha transformate un vetule cono de lampa in un diffusor pro uso photographic. Le “cosa” non es estheticamente finite — e probabilemente nunquam essera — ergo io non lo vole monstrar lo nunc. Ma io pote monstrar le resultato (nota le umbra sur le muro):

Sin diffusor

Con diffusor

Ultimate frisbee

noreply@blogger.com (Mardy) — Thu, 14 May 2009 18:01:00 +0000

Dominica io participava a un partita de Ultimate (un competition a equipas qui se joca con le frisbee), un del eventos recurrente organisate per le gruppo Couchsurfing de Helsinki. Benque mi condition physic me haberea permittite de jocar sin interruptiones, io faceva un pausa pro prender alicun photos, que es bellemente in monstra in le galleria.

Le subjecto non es in focus, ma le photo es equalmente interessante.

Prime victima!

noreply@blogger.com (Mardy) — Fri, 08 May 2009 18:14:00 +0000

Alicun tempore retro io publicava un annuncio in un gruppo de discussiones: io cercava modellos pro mi hobby photographic. Io explicava que io solmente voleva practicar photographia, e que io dava nulle garantia super le resultato del photos. E obviemente il non haberea ulle excambio de moneta: le modellos non haberea pagate me, io non haberea pagate les. Nonobstante iste premissas catastrophic, io recipeva un prompte responsa de Nancy, qui se offeriva como prime victima.

A causa de mi insecuritate io prendeva multissime photos (io non dice le numero, pro non expaventar vos), e postea deleva un grande parte de illos. Ma alicunes esseva acceptabile, e le meliores (secundo mi gusto) es publicate in le galleria.

Io attende vostre criticas (o congratulationes, si vos non sape de photographia!), e regratia Nancy pro le collaboration!

Presentation de “Promemoria”

noreply@blogger.com (Mardy) — Fri, 24 Apr 2009 16:21:00 +0000

Promemoria es un exhibition theatral del jornalista Marco Travaglio; illo es un opera teatral multo atipic, perque de facto il se tracta de lectiones informative que ha como themas le episodios del historia italian recente que non es narrate (o es reportate imprecisemente o partialmente) per le altere medios de communication. Ille usa le theatro pro facer information.

Il ha multe videos in youtube que monstra partes del eventos. Durante le festival del giornalismo in Perugia, Promemoria esseva presentate per Peter Gomez e Travaglio mesme; io lo ha trovate interessante e io vos consilia le vision (nota, cata video dura un hora!):

Intervention de Peter Gomez (le audio initia post alicun secundas)
Intervention de Marco Travaglio

Bon vision!

Geomappa

noreply@blogger.com (Mardy) — Thu, 23 Apr 2009 16:31:00 +0000

Iste articulo va esser un pauco technic, alora io es disponibile a pardonar le lectores qui se excusa pro lor ignorantia e non lo lege. ;-)

In le septimanas passate io ha contribuite a developpar osm-gps-map, un libreria open source que consiste de un widget que programmas pote integrar in lor interfacie graphic pro monstrar un mappa (prendite de openstreetmaps.org o de maps.google.com) e interager con illo.
Heri John Stowers, le author de osm-gps-map, ha publicate le version 0.3, que include anque mi contributiones. Iste version porta multe amelioramentos, e in particular me ha consentite de developpar un simple programma que lo usa: geomappa.

geomappa es un parve programma scribite in Python, que mostra un mappa del mundo que le usator pote aggrandir, reducer e mover pro selectionar un area; postea, si on porta alicun archivos JPEG super le fenestra del programma e los lassa cader (drag-and-drop), geomappa scribe le valor del coordinatas de latitude e longitudine in le archivo JPEG mesme, in le section GPS del datos EXIF. Iste operation es technicamente appellate geotagging (on poterea traducer lo in interlingua como “geomarcatura”), perque illo marca le JPEG con le position geographic in le qual le photo ha essite prendite.

Post que un archivo JPEG ha essite marcate per geomappa, alicun programma pote monstrar le photo sur un mappa; per exemplo, si on lo carga in Flickr, on pote vider le photos placiate in le loco ubi illos ha essite prendite: http://www.flickr.com/photos/mardytardi/map/ (iste characteristica de Flickr es normalmente non habilitate: si tu ha un conto Flickr, clicca hic pro activar le importation del information geographic de tu photos)

Illes qui vole probar geomappa lo trova hic. Le programma non necessita installation: illo require que osm-gps-map es installate (anque con le supporto a Python), e le uso es tanto simple que illo non require ulteriores explicationes. In futuro io va crear in le sito un pagina dedicate a illo e un repositorio git. Forsan.

Le seisma de l'Aquila e le campanias de disinformation

noreply@blogger.com (Mardy) — Tue, 14 Apr 2009 18:30:00 +0000

Annozero es mi unic puncto de contacto con le television italian, sia perque le episodios es visibile in internet, sia perque io non cognosce altere transmissiones que poterea interessar me. Le ultime episodio, appellate "Resurrezione", pone al centro del debatto le seisma que le 6 de april ha colpate l'Aquila, e in particular le difficultates in le gestion del emergentia — retardos e inefficientias in le adjutas — e le inexplicabile impreparation del protection civil que ha de facto ignorate le perturbationes seismic que jam existeva desde plure menses in ille region.

Le altere medios de information, efficacemente controlate per le regime, non ha hesitate a criticar Annozero e lo ha accusate de haber offendite le labor del voluntarios qui presta lor adjuta al population (accusation false, post que le unic criticas que emergeva in le debatto esseva al machina organisative). Con le exception del IDV (Italia dei valori, un del partitos del opposition), quasi nulle voce se ha levate pro defender le transmission Annozero e, in general, le libertate de information. Le situation es ben describite per Marco Travaglio in su monologo Passaparola:

Io invita totes illes qui comprende le italiano a reguardar le episodio “Resurrezione” de Annozero e a judicar per lor mesme. Le usatores de Linux pote discargar le episodio con le programma MPlayer, in iste maniera:


mplayer -dumpstream -playlist http://mediapolis.rai.it/relinker/relinkerServlet.htm?cont=po0zfTC8FmAeeqqEEqual

Ma pro concluder con un surriso, io vos lassa con iste photo, un del multissime que on pote trovar in flickr e que me place specialmente.