Le italianos se reuni ancora, in casa de Andrea pro celebrar in avantia le anniversarios de nascentia de Lucia e Simone. Le personas presente non esseva exactemente le mesme del septimana precedente (Italian Party 1), ma pro un singular principio de conservation del italianos le numero del italianos esseva constante (isto non es ver, ma le principio es comocunque digne de studio).

Iste vice le maxime parte del labor de cocina ha essite facite per Lucia, qui vince le premio "Miss Sacher 2006", e Anne, qui ha preparate le dulcissime "pulla"-s (io admitte que io non ha ben comprendite an isto es un producto finnese o sicilian — ma lo que importa es le resultato ;-) ).

Il ha duo videos del festa: le sufflo del candelas del torta e le cartas de augurios (con surprisa!). Non perde los!

E il ha alicun photos in le galleria del imagines, ma infortunatemente io non ha succedite a prender ulle elemento compromittente.

In le galleria del imagines io ha cargate le photos de mi visita al fortalessa de Suomenlinna, que es in un insula proxime a Helsinki. Le dies esseva incredibilemente splendente — ma anque extrememente frigide! Isto es le ration pro le qual in tote le photos io compare con guantos e con le bonetto del Italia.

Le altere duo personas que es presente in iste photos es Antonio e Diego, de Brasil. Io los regratia pro lor collaboration in prender le photos!

Un curiositate: nos incontrava altere italianos durante le viage, e nos discurreva un pauco. Illes veniva de Borno. Al fin, nos constatava que le mundo es vermente parve, perque nos ha un amico in commun: Luca Ghitti. Ciao Luca! :-)

Illes qui crede que in Finlandia il non ha multe italianos, illes es in error! Le problema es que le italianos de Helsinki ama concentrar se in le mesme locos del citate, ergo il non es facile trovar les in le ambiente natural. ;-)

Simone e Anne (su fidantiata) organisava un "sabbato italian" in lor appartamento. Le data esseva establite ante alicun menses, pro evitar absentias o forsan pro preparar le appetito al degustation del productos del cocina sicilian. Le matino esseva dedicate al preparation del cibo: ravioli e cavati. Io non pote parlar super ravioli, perque illos contine ricotta, que es un ingrediente mortal pro alicun empleatos italian in Nokia (e io pote critar con summe felicitate que IO NON ES LE UNIC!). Ma io es fer de haber contribuite al preparation del cavati in dar los le forma, con un enorme effortio de energias. Il esserea correcte dicer que le maxime parte del labor de preparation del pasta esseva realisate per le feminas (pro le italianos qui lege: "femina" in interlingua non es un termino negative) — ma post que io es intrinsecamente incorrecte, io non va dicer lo. Ravioli e cavati esseva servite con un sauce de tomates e carne de porco (finlandese?) cocinate per Simone.

Post le prandio, il esseva le torno del tiramisù de Andrea — excellente! Il esserea interessante saper si Fabio pote preparar lo equalmente ben! ...hint... :-D

Contrarimente a lo que eveniva con le miraculo del multiplication del panes e del pisces, in nostre caso al fin del prandio il non restava ulle sacco de cibo in plus. E nos anque habeva discursos profunde e illuminante — ma io non va reportar los hic, perque io dubita que le lectores poterea comprender los completemente.

Il ha photos del varie phases del die in le Galleria de imagines. Un breve ma intense video super le preparation del ravioli es visibile in YouTube.

Isto es un serie (disordinate) de ligamines a sitos de mi amicos:

• Yanello: le sito de mi fratre Andrea qui vive in Japon — in italiano, ma sin multe senso.
• LOCO: le sito de Loco, mi soror affin (le mulier de Andrea) — in japonese.
• Zeenix: le blog de Zeeshan, in anglese.
• Tonikitoo: le album photographic de Antonio, un mi amico brasilian que pro alicun menses labora in Helsinki pro Nokia.
• Andrea: le prime italiano qui ha passate le portas del Nokia!
• Simone: mi companio de ufficio, mi project-manager, mi co-anticaseista... — mmm... troppo de cosas in commun!
• Andrea Nasato: mi concitatano qui pro plure annos viagiava in le mesme traino, de Treviso al bellissime Padova &mdash attention: sito internet contaminate con Java!

In un discussion in le forum www.finlandforum.org a proposito de amicitias in Helsinki, alicuno ha mentionate le sito jollydragon.net, que io non cognosceva (estranie!). Io ha visitate le sito de JollyDragon, e lo ha trovate interessante: illo es un sorta de club, multo informal, que ha como objectivo le establimento de amicitias inter finlandeses e estranieros. On pote seliger inter le multe eventos proponite cata die, o mesmo crear noves, e vider si on trova altere personas qui condivide le initiativa. Io ha decidite de partecipar al Weekly Welcome, un serata in un pub del centro, specialmente pensate pro le nove membros de JollyDragon qui vole introducer se e entrar a facer parte del gruppo. Isto esseva mercuridi, in Memphis. Il habeva circa 20 personas; le homines esseva principalmente estranier e le feminas esseva finnese — e multo attractive, on debe admitter. Le incontro esseva multo calorose: Paul, le fundator e le “mente” de JollyDragon es un juvene irlandese con un charactere tanto amical que io nunquam ha vidite in alicun altere persona: ille va a prender (in senso litteral) personas totalmente incognite de altere tabulas del local e les porta inter nos assi que illes face nostre cognoscentia. E, incredibilemente, isto functiona. Io crede que io va participar sovente in lor activitates. Intertanto io ha initiate a facer propaganda pro illes: le poster de JollyDragon jam sta in le sala de café del Nokia.