Fin del expectation :-)

In un previe articulo de blog io annunciava le sito de PhotoTeleport, ma sin explicar que es iste "PhotoTeleport". Ora le sito es preste, e finalmente io pote solver le enigma: PhotoTeleport es un programma pro publicar photographias a plure sitos de photo sharing, contemporaneemente.

Le photographos, qui ha lor portfolios in multe sitos differente (Facebook, Flickr, DeviantArt, 500px e alteres) va trovar iste programma especialmente utile, perque illo va reducer grandemente le tempores que on debe "perder" pro repeter le mesme operation de cargar le mesme photos in cata sito. Ma in nostre epocha de vita virtual, ubi totes ama condivider lor proprie photos super plures retes social, PhotoTeleport pote resultar utile a cata uno qui ama condivider momentos de proprie vita con su amicos. De facto, io invita omnes a discargar le programma e probar lo. Illo es disponibile pro computatores con systema operative Linux, MacOS X o Windows.

Pro plus de informationes, visita le sito de PhotoTeleport; in particular, le pagina del demandas frequente e le blog deberea satisfacer a omne curiositate — alteremente, vos es benvenite a demandar me plus!