Desde le nascentia de Alexandro io quasi non plus curre o bicycla, ma sempre promena le perambulator con le infante. Io percurre sempre le mesme via proxime al rivo, con alicun variantes. Io mostrava alicun photos de iste promedana in un altere articulo. Ma le ultime vice io decideva de vader al direction opposite; certemente, io habeva vadite in ille direction multe altere vices, ma nunquam troppo distante, perque io credeva que le promenada non haberea essite multo interessante. Ma iste vice io lo explorava plus longemente, e trovava que illo es, de facto, multo agradabile.
Ecce alicun photos; infortunatemente il quasi non habeva sol, assi le photos non es multo expressive, ma io promitte que io va poner altere photos si tosto que io me promena per le mesme via con un tempore melior.

Finalmente le estate ha arrivate

 Iste prato, coperite per flores jalne, es multo proxime a nostre casa.

Silva densissime ;-)

 Post alicun kilometros, on entra in un silva (bosco). Le strata es ample, coperite per pulvere de serration (italiano: segatura), assi que le camminar es silentiosissime. E on non disturba le aves e le scuriolos.

Myrtillos! Io va retornar a iste loco plus tarde, pro mangiar los!

 A un certe puncto, le silva se aperi e le percurso passa proxime a un radura (prato circumdate per silvas).


 E, plus in avante, proxime a un minuscule laco:


E infin, io vole monstrar vos un arbore que on pote usar como un funda (italiano: fionda, anglese: sling) gigante:

Forsan illo pote esser usate como pincia (italiano: pinza, anglese: pliers)

 Io es le author de iste photo, ma io non esseva sol. Mi assistente stava in le perambulator, e ille es felice de presentar a vos tote iste photos.
Ecce mi assistente, in le rolo de presentator:
Io es secur que ille habera un brillante carriera como presentator!

Io es felice de annunciar que io ha publicate QtRaw, un plugin que permitte a tote programmas que usa le librerias Qt (e consequentemente, QML) de aperir e visualisar imagines in formatos raw; istos es le imagines producite per multe photocameras digital professional e semi-professional.
Si on vole visualisar le imagine in un formato reducite, le plugin utilisa le imagine de prevista (thumbnail), lo que es multo rapide.

E nunc io va; le prandio de Natal me attende. :-)

(this blog post is written in interlingua, an international language which you should be able to partially understand without previous study, with varying effort depending on your linguistic background. If you can't cope with it at all, just proceed to the GIMB's webpage)

Recentemente io probava le ultime version (2.8) de GIMP, le programma de manipulation de imagines que io frequentemente utilisa pro editar mi photographias.
Le ultime version ha plure innovationes del version precedente, ma — infortunatemente pro me — anque un cambiamento fundamental in le processo de archivation de imagines in formato JPEG. Durante que le precedente version permitteva de cargar un archivo JPEG, modificar lo e salvar lo ancora in formato JPEG, le nove version suggere de salvar le archivos modificate in un altere formato, XCF, que es le formato del projectos de GIMP (equivalente al formato PSD de Photoshop). Certemente on pote exportar le imagine modificate a un archivo in formato JPEG, ma in omne caso le programma demanda anque le archivation del projecto in formato XCF.
Pro me, le formato XCF es solmente un inutile (e grandissime) archivo, e generar un XCF pro cata photographia que io modifica in GIMP esserea un enorme guastamento de tempore e de spatio in le hard disk. Si iste affirmation vos pare excessive, considera que a vices io edita 100 photographias in un die — e altere photographos plus active, edita multo plus que 100 photos!

Alora, io contactava le developpatores de GIMP pro suggerer le addition de un option pro facilitar le labor del photographos, ma illes esseva irremovibile e totalmente resolute a refusar un tal developpamento — non mesmo si io mesme lo implementava. Illes me suggereva de utilisar un altere programma o de producer un fork (un version parallel, que include mi modificationes) de GIMP. Post que io non trovava in Linux un programma de manipulation photographic tanto potente como GIMP, io sequeva le secunde option: e assi, io vos presenta GIMB:


Como vos pote imaginar, io seligeva le nomine "GIMB" perque illo me permitte de cambiar facilemente le logo de GIMP, solmente per modificar le "P" in "B"; le altere option esseva "GIMR", ma isto me pare plus difficile a pronunciar.

Le unic characteristica que differentia GIMB de GIMP es le procedura pro archivar le imagines modificate; illo es le mesme que il habeva in GIMP 2.6:


Il non ha un option "Export", ma tote le formatos de imagines supportate per GIMB es directemente accessibile per le functionalitate de "Save"/"Save as".

Le sito del projecto GIMB es in github, e un version de test de GIMB es disponibile in un PPA pro Ubuntu 12.10.

Totevia, io spera que le futur versiones de GIMP va includer iste functionalitate, e alora GIMB essera solmente un solution temporanee.

Le ultime Ubuntu developers summit esseva in Copenhagen, Denmark. Io jam esseva in Copenhagen circa duo annos retro, in compania de Yulia e su familia, ma alora nos non spendeva solmente duo dies in le citate — per coincidentia, le dies que nos offeriva le tempore pejor — e nos videva solmente un parvissime parte del citate (specificamente, le parco de amusamentos Tivoli).
Ille breve visita me lassava un bon impression del citate, e io concludeva que si io debeva comparar Copenhagen con Helsinki, del puncto de vista touristic, io haberea dicite que Copenhagen es un poco plus belle.

Ma post mi secunde visita, que mi permitteva de visitar le citate per plus que duo dies, io debe cambiar mi conclusion e dicer que Copenhagen es multo plus belle que Helsinki!
Io me promenava per le citate e prendeva photographias, sin fermar me troppo tempore in le mesme loco. Io visitava plure parcos, e spendeva multo tempore ibi a causa de lor grande dimension — como es evidente del photos. Le resto del photographias es, como usualmente, in le galleria.

De tempore in tempore, io ama ancora photographar con un photocamera a pellicula, le excellente Minolta α-7 que io comprava (usate) in Japon alicun annos retro.


 Alicun dies retro, quando il habeva un excellente die de sol autumnal, io vadeva a promenar proxime al fluvio Vantaa.


Le sentiero que curre proxime al fluvio.


Al altere latere del sentiero, il ha campos e, plus distante, arbores que le autumno colora differentemente.


Iste fluvio es poco photogenic, perque illo ha sempre un color marron. Ma si on se bassa, alora le color marron es quasi invisibile, e le reflection es prevalente.



Io attendeva justo que le sol appareva detra le nube pro capturar iste photo. Illo es mi preferite!