Dicesi fritoea oggetto alimentare o non, rotondo o non, con crema o senza, ripieno sempre, con uvetta o senza, con pelo o senza.

"Semel in anno licet insanire" (="Un vice in un anno il es permittite esser folle"), es un del tantes expressiones proverbial que ha nulle valor e que de quando in quando servi como excusa pro alicun damno. Io lo debe usar, perque le damno que io ha committite es grande, e pro esser plus precise le damno es grande 43 metros quadrate e costa multe millenas de euros! Iste matino io ha signate le contracto de acquisition de un appartamento in Lauttasaari, un parve insula in le centro de Helsinki e un zona multo attractive (e expensive...) ben servite per le transporto public (plure pontes lo connecte al terra firme). Lo que surprende, es que toto ha evenite in minus que un septimana! Io vadeva al agentia, diceva que io esseva interessate in acquirer un appartamento e nos fixava un appuntamento le die sequente pro visitar isto. Duo dies postea, le processo de acquisition esseva jam initiate. Alicun mi collega pensa que io esseva troppo rapide in mi decision — ille ha ration, ma on non pote esser lente in toto!

Io me movera in le appartamento in majo, e forsan initiara alicun renovation — ma solmente si alicuno me promitte que ille venira a visitar me: alteremente, le condition actual es plus que satisfacente pro me!

In un nota a latere, io communica que le temperatura actual es -18 grados; lasciate ogni speranza, voi che atterrate!

Post alicun dies de temperaturas human (~0 grados), il ha habite un altere abassamento e nos ha retornate a -10. Altere nive ha cadite sur le citate e in mi opinion isto es un bon cosa, perque io ama camminar sur le nive, si illo non es troppo sordide. Io continua mi activitate de patinage sur glacie, hodie io lo ha practicate pro le sexte vice e io illo me place sempre plus, benque io admitte mi total incapacitate. In le photo on vide le pista de patinage ubi io va usualmente (illo es in le centro del citate, justo a latere del station ferroviari), e in fronte a illo un povre tigre que esseva surprendite per le glaciation durante que illo vadeva a chassar salmones. Infortunatemente le photo esseva realisate per mi telephono, ergo le qualitate es assatis scadente (si, io lo sape, que mesmo photos prendite con le photocamera es assatis scadente, si le photographo es io!).

Un actualisation super mi filio N800: il ha plure sitos internet que parla de illo, e le commentos (etiam per parte del usatores) es generalmente enthusiastic. Uao! :-)

Forsan le hiberno ha finalmente arrivate! Post circa duo menses, le temperatura ha retornate a -7°, assi como illo esseva in novembre, pro alicun dies. Le nive del dies passate ha completemente disapparite, e con iste temperatura io non sape si nos va haber lo — in omne caso, hodie il es un die de sol (al minus del 9:03 al 16:01; quasi septe horas!). Le aspecto positive es que le frigido es un bon stimulo pro practicar ice-skating, i.e. patinage sur glacie: io ha recentemente comprate un copula de patinos e intende continuar a ridiculisar me in le pista. Usque nunc io non ha ancora cadite un sol vice, ma isto es probabilemente causate per le facto que io es multo prudente (lege: lente).

Fabio e Mirco es decise a venir a visitar me in Helsinki pro alicun dies in le medio de februario — ex mi amicos finlandese, illo es le periodo le plus frigide del hiberno: esque illes supervivera? O io habera duo homines de nive plus, in mi jardin...

Anteprima pro informaticos: le software al qual io labora essera probabilemente publicate como Open Source — stay tuned!

Finalmente! Heri, le 8 januario 2007, mi filio ha nascite! Le doctor Olli-Pekka Kallasvuo annunciava heri durante le CES in Las Vegas le nascita del N800, le nove internet tablet que porta in se un parte de me — quatro menses de programmation! Pro celebrar le evento, heri on ha habite un party in le officio, e totes ha recepite in dono un exemplar del N800: finalmente etiam io ha un filio a crescer! Le distribution del N800 ha jam initiate, al minus in le Statos Unite, e forsan etiam in Europa. Ma qui se cura? — io ham lo ha! :-)

Jam desde alicun dies ante le annunciation official, alicun blogs e sitos de informatica reportava alicun rumores circa le N800, obtenite per fontes non official. Le cosa le plus amusante pro me es leger le commentos del visitatores de iste sitos: illes non cognosce le device, ma illes pote scriber paginas e paginas de suppositiones e recensiones "a distantia". :-)

Alicun ligamines:

• Sito official: http://www.nseries.com/n800
• Le annuncio in Punto Informatico
• Un recension in un blog