Heri vespere io ha publicate le version 0.2 de un plugin que io ha developpate pro le OS2008 (que es le systema operative del N800/N810). Le plugin es un home desktop applet que monstra le datos financiari del titulos que le usator ha seligite: Le datos es prendite de Yahoo!Finance. Le applet es ancora in un stato non optimal, specialmente perque:

• Le graphica es horribile (il manca le effecto de transparentia)
• Si il ha multe titulos a visualisar, il ha un belle effecto de rolamento; ma isto require un certe labor per le CPU, ergo pro non exhaurir le batteria on deberea stoppar lo quando le applet non es visibile (per exemplo quando le schermo es obscur)
• io es secur que il ha multe cosas a corriger

Nonobstante isto, le applet es multo stabile e io ha ponite multe effortios in verificar que illo non perde memoria (in gergo informatic, que illo non produce memory leaks); io es satisfacite de isto, perque ora le applet pote functionar per plure dies sin exhibir problemas.

Le projecto es registrate in le garage de Maemo, e plus precisemente al pagina https://garage.maemo.org/projects/stock-plugin/.

Iste matino io ha recepite un carta postal de augurios de bon Natal, totalmente inexpectate. Gratias! Ma... qui es le author? Oh! Illes es mi amicos de K-RAUTA, un negotio de equipamentos pro le casa, que io ha sovente visitate durante iste estate, quando io renovava mi appartamento. Io lo visitava tanto frequentemente, que mi amicos burlava in dicer que tote le personal de K-rauta me cognosceva personalmente. Mmmm... que dicera illes post saper de iste carta postal?

Io ha retornate hodie de un breve viage in Polonia, plus precisemente a Varsavia. Le amicos polonese qui io cognosce in Helsinki me habeva alertate que Varsavia es un del citates minus actractive del Polonia, ma io ha essite multo satisfacite de lo que ha vidite. Le tempore non esseva perfecte, il habeva sol solmente sabbato, durante que in le altere dies le ciel esseva coperite per nubes non troppo aggressive.

Io ha versate un mar de photos in le galleria, pro vostre uso e consumo.

Le 2007 essera recordate, inter le altere cosas, pro le establimento de un importante competition sportive, le Tropheo Ambrosioni. Organisate pro honorar le homonyme amico (e collega, e companio de football) qui va abandonar le frigide terras de Finlandia pro retornar al calide colles roman, iste torneo de football essera disputate cata anno inter le melior jocatores de football qui cata septimana se incontra pro un match amicabile.

Iste anno on habeva 20 jocatores dividite in 4 agguerritissime equipas cuje membros esseva extracte a sorte, ma de un maniera que le fortia del equipas esseva multo balanciate. Le equipa in le qual io ha jocate (consistende de duo italianos, duo finlandeses e un brasiliano) esseva nominate “Mardy United”, obviemente non per me. Le torneo consisteva de duo semifinales, final e final pro le tertie e quarte posto. Sin surprisa, mi equipa vinceva le torneo e portava a casa le grandiose “1° Trofeo Ambrosioni”, e cata uno de nos esseva premiate con un medalia representante duo jocatores de football (vide le photos in le galleria). Le altere equipas esseva premiate con del ballas de gumma e con del barras de chocolate.

In le photo de gruppo on pote observar que io vestiva un T-shirt con le logo de maemo.

Un bon parte del italianos qui io cognosce a Helsinki es amicos incontrate in partitas de calcetto (io non cognosce le vocabulo anglese, ma io intende le partitas de football que on joca con 5-6 jocatores pro equipa — mini football?); quasi omne sabbato postmeridie nos va jocar un partita. Purmente amical, sin agonismo e tension. Io es un pexime jocator, ma nonobstante isto io ama iste sport e io cerca de non mancar ulle incontro.

Durante le hiberno nos joca in un sala coperite, pro evitar le risco de congelamento. ;-) Le sala es optime pro nos, e offere duchas e sauna. Toto ha sempre essite perfecte.

Le ultime sabbato nos debeva interrumper le incontro pro alicun minutos, durante le quales tote nos teneva lor oculos a reguardar le tecto del sala: Le palla esseva bloccate inter le cavos que rege le lampas!

Pro le cronaca, nos continuava le partita con un altere palla, perque nos non succedeva in recuperar le nostre.