In occasion del World Village Festival que occurreva in Helsinki le 26 e le 27 de majo, io hospitava in mi appartamento alicun voluntarios del EVS (European Voluntary Service) qui arrivava de altere citates del Finlandia pro visionar le evento. Post un septimana, Marion e Ute me invitava pro un barbecue in Lieto, un village proxime a Turku, e io succedeva a convincer Lassi a venir con me (il non ha essite facile). Nos arrivava in Turku sabbato postmeridie, e nos promenava in le proximitate del centro del citate. Mi fotos meraviliose es in le galleria, como usual.

Con un mense e un die de retardo, io publica alicun photos que io habeva oblidate in mi photocamera — un cosa aliquanto inusual pro me. Le photos es prendite le prime de majo, le festa international del laboratores; in Finlandia iste festa es appellate Vappu, parola que probabilemente es un finnisation del nomine de Sancte Walburga e es cognoscite in le paises nordic per le nomine “nocte de Walburga”. Iste festa es particularmente significative pro le studentes finlandese, perque illo coincide approximativemente con le termino del anno scholastic (e universitari), e gania un grande participation gratias al facto que illo es le prime grande festivitate del primavera. Como usual, le festa es un importante occasion pro biber multe alcohol, ma le characteristica que vos probabilemente observara in le photos es le facto que multissime personas porta un bonetto blanc: illo es parte del costume official que le studentes porta quando illes ceremonia lor graduation al schola secundari. Un altere characteristica del festa es que in le multitudine del personas il ha plure gruppos que porta un supertoto (italiano: tuta, anglese: overall) que es distinctive pro le gruppo; in le caso del studentes universitari, il pare que illes se collige in gruppos a secunda del facultate universitari que illes studia.

Reguarda le photos hic: Galleria del Vappu — illes qui ha vidite Helsinki in hiberno essera surprendite de vider como in primavera il ha si multe personas!

Pro le amantes del cinema, io ha un titulo a consiliar: Summer Time Machine Blues. Benque le nomine del film pare anglese, de facto il se tracta de un film made in Japan, que difficilemente essera publicate in Europa o foras del Japon: il non ha samurais, yakuzas o geishas que pote capturar le interesse del publico occidental, ma solmente un gruppo de juvene amicos que viagia in le tempore. Le idea non es nove, illo es jam utilisate in multe filmes con differente intentiones: a vices le viage in le tempore es un pretexto pro introducer un aventura fantastic, a vices illo es le thema de episodios de scientia fictive, sci-fi, plus o minus plausibile logicamente. Le imagination non ha limites, e viages temporal pote esser un bon argumento pro fantasticar; imaginar le futuro es un cosa, ma il es facile e inevitabile discoperir que le viage in le passato causa un absurdo logic que rende tote le scena irrealisabile. Summer Time Machine Blues supera, con inventiva e originalitate, le paradoxos que se crea quando on viagia in le passato, e se explica in un sympathic mixtura de humorismo, absurditate e logica infallibile, que al fin non mancara de portar le spectator a reflecter super le conceptos de tempore e necessitate.

Io ha trovate un trailer in YouTube, ma illo es sin subtitulos...

Io ha essite silente in iste periodo, perque io ha movite le sito a un nove servitor. Mi intelligentissime publicationes reinitiara tosto. :-)

Le viages continua... Porvoo es un placente citate maritime locate a 50 kilometros a est de Helsinki. Si, forsan io debeva omitter de scriber le distantia, assi que on continuava a creder que isto esseva un ver viage, e non un simple promenada. Ma io non utilisa le kilometros como unitate de mensura de mi dies. Le occasion pro visitar Porvoo esseva le visita de Francesco e Michela, que ha essite in Helsinki del 24 al 29 april, in le melior hotel del citate (mi casa). Le idea initial esseva prender un automobile e currer verso Savonlinna o Kuopio, ma con nostre grande surprisa pro rentar le auto il esseva requirite pagar per carta de credito, que nos non ha. On non mesmo acceptava le pagamento in moneta o carta bancari, solmente carta de credito. Nulle problema: le plano B ha functionate multo ben! Nos ha prendite un autobus, multo plus economic (e secur, he he!) e in pauc tempore ha arrivate in iste belle citate. Io esseva pigre e non portava mi photocamera; tote le photos ha essite prendite per le camera de mi amicos, e Francesco es le autor de multe de illes (gratias!) — nunc io considera seriemente le acquisition de un photocamera simile (un modello de Canon IXUS), sia pro le parve dimensiones, sia pro le bon qualitate. Io quasi oblidava dicer que le photos es hic! (le ecclesia de Porvoo es absente del photos, perque illo es in phase de restauro, post que un incendio ha destruite le copertura)