Mardy (Posts about informatica)

Galleria

Alberto Mardegan — Mon, 28 Jan 2008 21:00:00 GMT

Post que io notava que le sito esseva particularmente lente, e sovente le galleria del imagines non functionava (illo non appareva del toto!), io ha volite probar un altere programma pro monstrar mi operas anartistic: le resultato es hic. In theoria, iste systema deberea esser plus rapide, e le aspecto esthetic un poco melior, ma non ben integrate con le resto del sito. Io ancora es indecise si utilisar iste systema (que es appellate Gallery2) o restar con le actual: un importante pro de Gallery2 es que le importation del imagines es extrememente rapide e simple, e le possibilitates de personalisation es plus ample.

Si alicuno ha commentos in proposito, io es tote oculos. :-)

Patre, pro le secunde vice

Alberto Mardegan — Wed, 17 Oct 2007 20:00:00 GMT

Le N800 habera tosto un fratre! Le N810 ha essite officialmente annunciate heri, e immediatemente photos e characteristicas technic ha apparite in plure sitos; pro le italianos, io signala technews.it. Vide lo pro photos e recension!

De facto, mi secunde filio non ha ancora nascite: illo non es ancora disponibile in le botecas, ma on non debera attender multo. Optimisticamente, illo essera commercialisate ante Natal, assi que illo potera esser regalate al amantes del technologias. Le precio non es definite; il pare que le version american costara 479 dollaros, equivalente a circa 340 euro, ma il ha nulle information official circa le precio in Europa.

Le novitates plus importante de iste modello es, a mi aviso, le presentia de un claviero (it: tastiera, en: keyboard) e le navigator GPS.

Silentio

Alberto Mardegan — Wed, 16 May 2007 20:00:00 GMT

Io ha essite silente in iste periodo, perque io ha movite le sito a un nove servitor. Mi intelligentissime publicationes reinitiara tosto. :-)

Mi filio ha nascite!

Alberto Mardegan — Mon, 08 Jan 2007 21:00:00 GMT

Finalmente! Heri, le 8 januario 2007, mi filio ha nascite! Le doctor Olli-Pekka Kallasvuo annunciava heri durante le CES in Las Vegas le nascita del N800, le nove internet tablet que porta in se un parte de me — quatro menses de programmation! Pro celebrar le evento, heri on ha habite un party in le officio, e totes ha recepite in dono un exemplar del N800: finalmente etiam io ha un filio a crescer! Le distribution del N800 ha jam initiate, al minus in le Statos Unite, e forsan etiam in Europa. Ma qui se cura? — io ham lo ha! :-)

Jam desde alicun dies ante le annunciation official, alicun blogs e sitos de informatica reportava alicun rumores circa le N800, obtenite per fontes non official. Le cosa le plus amusante pro me es leger le commentos del visitatores de iste sitos: illes non cognosce le device, ma illes pote scriber paginas e paginas de suppositiones e recensiones "a distantia". :-)

Alicun ligamines:

Sito official: http://www.nseries.com/n800
Le annuncio in Punto Informatico
Un recension in un blog

Code camp, 2

Alberto Mardegan — Thu, 07 Sep 2006 20:00:00 GMT

Iste ha essite mi tertie e ultime die in le code camp; deman io non potera participar perque io essera ingagiate con le relocation al appartamento: io va signar le contracto, e sperabilemente io va mover me ibi in le mesme die. Ma super isto, io vos informara in le dies sequente. Como io vos preannunciava, heri e hodie io ha essite le phantasma de Zeeshan: io sedeva proxime a ille, reguardante lo que ille faceva e, aliquando, io le demandava explicationes. A vices io mesmo le corrigeva; alora ille me ha dicite "Si, il es un bon idea que tu sede hic!" — io me senti honorate. :-) Pro me, le code camp ha essite le occasion pro vider in action le prototypo del successor del Nokia 770, que es — como io al fin ha discoperite — le producto con le qual io laborara in le menses veniente. Iste nove Internet Tablet es totalmente coperite del secretos industrial, ergo io non pote revelar vos ulle information; ma io crede que io pote dicer vos que io esseva favorabilemente impressionate.

Al fin del die laborative, nos ha consummate un sauna; illo esseva le prime sauna pro me, e io crede que io ha superate le proba con successo. De facto, io debe admitter que io me expectava alique ancora plus extreme, plus fatigante e choccante; ma si io lo compara con un cursa (o un altere activitate physic demandante) de medie hora, io trova que le sauna es multo "soft", in le senso que illo non stressa le physico, e que on poterea repeter lo durante tote un die sin fatigar se. O, al minus, iste ha essite mi prime impression. Un altere cosa a dicer, es que le respiration non es sempre facile, a causa del elevatissime temperatura del aere. Io es gaudente de haber probate le sauna in compania; e post que nunc io sape que illo non es un cosa tanto terribile como io timeva, io potera etiam entrar in sauna sol — si con le appartamento io habera accesso a un.

Infortunatemente io non ha altere photos de iste dies a monstrar vos; ma Zeeshan e Naba ha capturate alicun photos e in le septimana sequente io va demandar les an illes vole condivider los con me. :-)

Code camp

Alberto Mardegan — Mon, 04 Sep 2006 20:00:00 GMT

Le code camp es in plen activitate. Le sol exception es io, qui ancora es un pisce for del aqua. Io ha passate le die in leger tote le documentation que io trovava super D-Bus, FarSight, Telepathy e a sequer como un umbra mi collegas Simone e Naba (io ha discoperite que ille es le autor de anjuta, mirabile!). Deman le victima va probabilemente esser Zeeshan, ma ille ancora non lo sape.

Io ha capturate un photographia del code camp, ubi on pote vider como le ver programmatores labora.

Al labor!

Alberto Mardegan — Sun, 03 Sep 2006 20:00:00 GMT

Hodie il esseva mi secunde die de labor, ma de facto le prime die de activitate intelligente. :-) De facto, venerdi io solmente visitava le palacio del Nokia, quasi como un tourista, e legeva con interesse le informationes presente in le intranet (informationes reservate al empleatos, ergo io non pote dicer nihil re los, non mesmo sub tortura).

Ma hodie io esseva productive e installava Debian etch, ancora in version beta, sur un del computatores portabile a mi disposition (duo Thinkpad del IBM — in le altere infortunatemente il ha Windows). Le installation non esseva multo facile, perque un del requisitos de Nokia es que tote le discos debe esser cryptate; e le supporto al cryptation in debian-installer es ancora in phase beta. E, prevedibilemente, il habeva problemas: le procedura de installation non carga le modulo dm_crypt que es necessari pro operar con partitiones cryptate, ergo io debeva cargar lo manualmente. Un altere problema esseva que le partition de swap non esseva recognoscite correctemente, ma un recerca sur google me portava al solution (io es secur que il ha millenas de personas interessate in iste detalios technic).

Deman e le die sequente io va probabilemente esser absente de internet: io va a facer compania a mi collegas que iste septimana ha un "code camp" (session intensive e collaborative de programmation) in Espoo, un citate proxime a Sofia. Io spera de poter retornar mercuridi, pro haber tempore de completar le questiones burocratic de mi permanentia in Finlandia.