Mardy (Posts about Helsinki)

Ambitiones

Alberto Mardegan — Sat, 19 Apr 2008 20:00:00 GMT

Clicca pro vader al album! Pro le prime vice in iste anno io ha prendite mi bicycletta e ha lentemente (e non sin fatiga) percurrite circum le parve pecia de mar que sta a nord de Lauttasaari. Io ha addite le photos in le galleria, ma le plus singular es iste: le cosa blanc es un cygno qui se lava in le mar, con su capite immergite sub le aqua, e un oca passa in fronte a le e, tendente su capite verso le cielo, emitte su voce. Differente ambitiones?

(in)Faustus!

Alberto Mardegan — Thu, 17 Apr 2008 20:00:00 GMT

Isto es le manifesto del representation de nostre tragedia, Faustus, extrahite del opera The tragical history of Doctor Faustus per Christopher Marlowe. Ancora il non es clar si nos va representar un tragedia, o si nostre representation essera un tragedia. In omne caso, illes qui se trova in Helsinki in le 9 de majo e vole passar duo horas in maniera differente, pote reservar un sedia per scriber a helsinkitheatre@gmail.com (in anglese!). Le gruppo se ha formate in septembre 2007, e nos ha initiate a practicar iste tragedia del initio de iste anno, quasi cata septimana. Le recitation essera in anglese, pronunciate con varie accentos differente a causa del differente provenientia del actores. Io parlara in anglese con accento interlinguista. ;-)

Lauttasaari blanc e blau

Alberto Mardegan — Sat, 29 Mar 2008 21:00:00 GMT

Io es un character abitudinari, totalmente sin phantasia! Anque hodie, pro prender alicun photos, io ha repetite le promenada a costa del mar in Lauttasaari, e de consequentia le photos non pote esser troppo differente de los qui vos jam ha vidite 1000 vices. Ma pro vostre fortuna, le subtil strato de nive (illo non esseva tanto subtil, alicun dies antea!) colora le panoramas de blanc, assi que anque le plus povres qui solmente dispone de un monitor blanc/nigre non es multo disavantagiate.

Clicca sur le photo pro vader al album. Nota que quando on vide le photos, on pote cliccar ancora sur le imagine pro aggrandir lo plus, usque a un dimension maxime de 2048x2048 (un bon compromisso inter qualitate e dimension).

Promenada invernal per Lauttasaari

Alberto Mardegan — Thu, 10 Jan 2008 21:00:00 GMT

Post cinque menses, le dominica passate io ha facite ancora le promenada per Lauttasaari que io faceva quando mi parentes esseva hic a visitar me, in augusto. Nunc le panorama es cambiate completemente: le mar es partialmente glaciate, e mi curiositate ha essite specialmente trovar le puncto ubi le mar passa de glacie in aqua. Inter le glacie e le aqua liquide il ha uno o duo metros de mar semiliquide, gelatinose, que se move per le undas, ma multo plus pigremente. Infortunatemente le conditiones atmospheric non esseva multo ben, perque le jam debile sol esseva quasi totalmente coperite per nubes (que in le dies successive ha portate un pauco de nive e, con le altiamento del temperatura, pluvia). Ma post que io non sape quando io facera ancora le mesme promenada io prefere condivider le photos ora, ante que passa altere cinque menses e le glacie potera esser trovate solmente in le refrigerator. Alora, si vos vole, reguarda le photos con un tremor de frigido.

Nive, finalmente!

Alberto Mardegan — Sun, 06 Jan 2008 21:00:00 GMT

Le prime nive del anno ha cadite; non multe, ma bastante pro coperir stratas e tectos de blanc. Le photo sequente ha essite prendite del porta de mi casa.

E isto es le strata principal de Lauttasaari (nota le enorme traffico!):

In caso que alicuno se pone le question: no, le floccos de nive non es tanto luminose in Finlandia! Illos appare luminose perque illos reflecteva le flash de mi camera. De facto, le floccos de iste dies es multo parve e le nive es multo sic — lo que es perfecte, perque le nive appare plus blanc e non deveni sordide multo facilemente.

Ma io debe concluder con un mal nova: mercuridi le temperatura se altiara e tornara a 0 grados (o forsan positive), lo que significa que tote le nive va disfacer se. :-(

Le calide sol de mediedie

Alberto Mardegan — Wed, 19 Dec 2007 21:00:00 GMT

Dominica io me trovava in le placia del mercato, kauppatori (del qual on pote vider un animation panoramica a 360 grados), e post que il esseva un bellissime die de sol, io prendeva un photo pro capturar le sensation. Lo que forsan non es evidente, es que le sol esseva quasi perfectemente a sud: le hora esseva 13:46.

Augurios de bon Natal

Alberto Mardegan — Thu, 13 Dec 2007 21:00:00 GMT

Iste matino io ha recepite un carta postal de augurios de bon Natal, totalmente inexpectate. Gratias! Ma... qui es le author? Oh! Illes es mi amicos de K-RAUTA, un negotio de equipamentos pro le casa, que io ha sovente visitate durante iste estate, quando io renovava mi appartamento. Io lo visitava tanto frequentemente, que mi amicos burlava in dicer que tote le personal de K-rauta me cognosceva personalmente. Mmmm... que dicera illes post saper de iste carta postal?

Columbo de Natal

Alberto Mardegan — Mon, 12 Nov 2007 21:00:00 GMT

Hodie io ha recepite un pacco del posta: Illo es 23 discos DVD con le complete series del inspector Columbo! Le surprisa initial ha augmentate quando io ha vidite qui es le author del dono: Incredibile! :-)

Incertessas atmospheric

Alberto Mardegan — Sat, 13 Oct 2007 20:00:00 GMT

Compara iste duo photos:

Eh, si: le prime nive jam ha arrivate! De facto, illo esseva miscite con pluvia, assi que illo non lassava alicun tracia, ma subito se disfaceva. Le altere photo es del die sequente, que esseva totalmente sin nubes. Le temperatura nunc es de -1 grados, ma le previsiones pro le septimana veniente annuncia un altiamento del temperatura, con un media de 10 grados. Pro le ver nive on debera attender ancora!

Bicycletta

Alberto Mardegan — Mon, 03 Sep 2007 20:00:00 GMT

Profitante del discontos de fin estate, io ha comprate un bicycletta. Io non sape si io habera le occasion de usar lo ante le primavera del proxime anno, ma isto es un aspecto secundari. Intertanto, io lo ha usate solmente un vice, le sabbato passate, quando in le matino il habeva sol e un temperatura relativemente calide. Io non saperea dicer qual percurso io ha seguite, io curreva per Lauttasaari sin un destination, e de facto per plure tempore io non habeva ulle idea de ubi io esseva. Ma ha retornate a casa con successo.