Mardy

Le Presidente Del Republica Italian Ignora Le Constitution?

(pro le lectores qui lege iste blog pro le prime vice: le lingua usate es interlingua, un lingua international immediatemente comprensibile per milliones de personas sin necessitate de studio previe)

Giorgio Napolitano, le actual presidente italian, ha heri (23 Julio 2008) firmate un importante lege, technicamente appellate “lodo Alfano” (e non technicamente appellate “lege porcada”), que dona le immunitate juridic total al quatro plus importante cargas politic pro le exercitio de lor mission: le presidente del republica, le prime ministro (qui actualmente es le sempre-innocente Silvio Berlusconi), e le presidentes del duo cameras parlamentari. Iste lege, que esseva necessari pro ridiculisar le democratia italian, pare esser in conflicto con le tertie articulo del constitution italian, que dice: “Tote citatanos […] es equal in fronte al lege, sin distinction de sexo, racia, lingua, religion, opiniones politic, conditiones personal e social. […]”. Le “lodo Alfano” es un lege ordinari, ergo illo non pote contradicer o modificar lo que es scripte in le constitution (solmente un lege constitutional pote limitar un lege constitutional); ma alora, como conciliar le duo cosas? Le conclusion es simple: si tote citatanos es equal in fronte al lege, ma le presidente del republica e su amicos intime non lo es, isto significa que iste quatro personas non es citatanos italian. Le presidente del republica italian, durante le periodo de su carga, non es un citatano italian. Esque ille va restituer su passaporto? In omne caso, le italianos es governate per quatro refugiatos, que ha un altissime probabilitate de esser criminal: de facto, benque le impunitate dura solmente pro le periodo de lor mission, le facto que illes es vetule e le lentessa del justitia italian es quasi un garantia que illes nunquam pagara pro lor crimines — que illes pote committer apertemente. Que pote facer le citatanos italian pro stoppar iste “banda del quatros”, como le popular humorista Beppe Grillo los appella? Si le justitia non ha poter super illes, le unic maniera es eliminar les physicamente, ma le lege non lo consenti. Alora, on pote solmente attender, e sperar que le natura face su corso rapidemente, ante que illes committe crimines irreparabile. Deo, salva nos!

Mi dedica al membros del banda del quatro

Picnic in Suomenlinna

In compania de Lassi e mi hospites de Taiwan, Yiju e June, nos ha vadite a Suomenlinna pro facer un picnic. Le photos es in le galleria, ubi on pote admirar un version magnificate de iste juvene estimator de Batman,

un incredibile collision de un nave contra le insula,

(pro illes qui vole creder lo) e un ave — non me demanda le nomine, io es ignorante — que ha girate su capite de 360 + 180 = 540 grados:

Obviemente in le galleria il ha photos multo plus belle de istes, ma io es troppo timide e modeste pro monstrar lo al prime pagina. Va e admira los in contemplation!

Oh, io debe commentar anque iste photo, alteremente on non comprende perque io lo poneva in le galleria:

Isto es le folla que voleva prender le barca pro retornar a Helsinki: multo plus de quanto le barca (que es comocunque multo grande) pote portar. Alora un parte de illes ha remanite in Suomenlinna pro altere 20 minutos, a attender le barca successive. Si on considera le position del photographo, il non es difficile imaginar que ille face parte del secunde gruppo…

San Petroburgo, Parte 3

Un ecclesia que multo me place exteriormente, ma que io non visitava internamente, es illo del Salvator super le Sanguine Versate:

Ecclesia del Salvator sur le Sanguine Versate
Le cupola plus alte pare pertiner a un gelato

Le die sequente, dominica, nos habeva in programma le visita al fortalessa de Petro e Paolo, ma un pluvia insistente nos discoragiava, e in ultra nos non habeva sufficiente energias pro saltar super le pontes altiate que duce al insula ubi le fortalessa se trova. Le pontes normalmente non es altiate durante le die, ma solmente in le nocte; totevia, ille die esseva un die festive in Russia (le festa del familia, si io non erra), e il habeva alicun celebrationes que imponeva le apertura del pontes:

Io voleva saltar, ma le policia me stoppava — homines de poca fide!

In le postmeridie le tempore se ameliorava, e nos lo passava in un parco de amusamentos. Io probava alicun attractiones extreme, le plus “forte” del quales esseva iste (io sape que illo pare quasi innocue, ma on debe probar lo pro comprender!):

Io voleva saltar, ma le policia me stoppava — homines de poca fide!

Con isto, se completa le narration de lo que io ha vidite in San Petroburgo. Ma si alicuno me demandava qual es le cosa que plus me ha impressionate in iste viage, io responderea que illo non es in iste lista. De facto, illo non es in San Petroburgo, ma in un village vicin, del qual io non pote dicer le nomine (ma que le plus attente de vos trovara facilemente in le galleria):

Un ridente village, de location incognite

Yulia non voleva que io prendeva iste photos, e non vole que io dice que iste village se trova in Russia; pro iste ration, io non va dicer lo. Ma io debe absolutemente dicer que, ben que le exterior del casas e del palacios da un impression miserabile, le interior (al minus lo que io ha vidite) es multo plus dignitose del interior de mi appartamento in Helsinki que, como mi visitatores sape, jam es excellente. Le elementos plus importante de iste village es, in ordine crescente, un statua de Lenin,

Ille es identic!

le hospital,

Io ha resistite a un tentativa de censura

e, sin umbra de dubios, le theatro:

Faustus ha essite hic!

Vos debe excusar mi senso de humorismo tanto academic. De facto, io esseva fortemente attracte per iste village; le conditiones del infrastructuras public, evidentemente negligite per le administratores del municipalitate, contrasta con le bontate e le spirito de initiativa del personas qui vive in le area: mi impression es lo de un loco que le incurantia vole oblidar, e que le inhabitantes vole resurger. Per isto, io experiva admiration pro ille gentes qui vive, labora e ride in lor pais. Oh, ma io non ha ancora scribite qual es le recordo plus importante del viage:

Le tubos!

Jam on los poteva vider in le photo precedente: le tubos es ubicunque in le village. Il ha passerellas pro le pedones que los superpassa, e pro consentir le passage del carros le tubos se altia del terreno e forma portales multo characteristic. On me diceva que solmente in ille village il ha iste situation. Le question successive es: que passa in iste tubos? Aqua calide. Si, isto es le responsa. Io non comprende como isto pote functionar durante le hiberno, e quando io ha demandate explicationes, on me ha respondite que, quando le tubos ha essite placiate in le village, isto esseva le solution plus economicamente conveniente. Io imagina que le convenientia de ille momento ha essite destruhite per le expensas del dispersion del calor in le annos sequente, ma como sempre eveni, le solutiones temporari es le plus permanente (si io non erra, isto es anque un expression popular russe). Io spera que, in un futuro proxime, le administration municipal construe tubos sub le terreno; ma sin remover le tubos existente, assi que multe altere touristas pote passar sub illos.

San Petroburgo, Parte 2

Multe photos in le galleria es prendite durante un tour in barca, con un voce que commentava e narrava le historia del locos e del monumentos. In russo, ma fortunatemente mi interprete personal me traduceva le informationes essential pro le superviventia.

Le Palacio de Hiberno, quasi indistinguibile del acqua e del celo

Infortunatemente le faciada principal del Palacio de Hiberno, lo que se monstra del placia (appellate originalmente “le placia del Palacio”) esseva sub manutention, coperite per structuras metallic e panellos touristicamente non multo appreciabile, e pro iste ration illo es absente del album photographic. Pro compensar iste mancantia, vos pote gauder del vision de iste palacio:

In honor de mi fratre, un rarissime exemplar de ambassada japonese

Postea, nos ha admirate le cruciator Aurora (o “Avrora”, con le pronunciation russe), del qual io ha legite le historia ante duo minutos, in Wikipedia (le mesme pagina es disponibile in varie linguas, estraniemente non interlingua), e pote assi narrar vos que illo esseva “baptisate” in le majo del 1900, e ergo es optimisticamente plus vetule que le major parte de vos.

Le cruciator Aurora, actualmente un museo

In continuar le percurso in barca, nos navigava proxime al Jardin de Estate, anque isto appellate con multe originalitate. Ma isto nos consenti al minus de saper que le Czar russe passava su hibernos in un palacio, e su estates in un jardin. Al termino del excursion nautic, nos promenava per le centro del citate, e un del attractiones plus remarcabile es securmente iste,

le museo del chocolate!

Nos non lo visitava, habente le suspecto que un barra de chocolate plus vetule que 50 annos non es probabilemente bon a mangiar, ma supertoto io crede que si, 50 annos retro, altere personas non lo mangiava, il debeva haber un motivo. Un altere cosa curiose se trovava in le placia del Palacio:

Un simplice autobus?

Nonobstante le apparentias de un autobus ordinari, si on reguarda attentivemente le pictura on pote leger “WC”; iste autobus es parcate in le placia como WC mobile e estheticamente non horribile. O forsan illo es un bus totalmente ordinari, ma le autista ha oblidate de clauder le portas, e le publico con urgentias los usa pro exercitar lor besonios primari. De un cathedral multo alte io ha prendite alicun photos panoramic del citate, ma necun de los es digne del publication in prime pagina. Nos ha continuate le promenada in un parco, ubi il habeva plure festeamentos de matrimonios, principalmente a scopo photographic (al minus isto es mi impression). Oh, io quasi oblidava de celebrar le technologia futuristic de San Petroburgo! Vide isto:

Ancora venti secundos

In alicun lumines pro le traffico pedonal il ha le indication de quante secundos on debe ancora attender, si le signal es rubie, o de quante tempore on ha a disposition pro passar, si illo es verde. Io dubita que isto va altiar considerabilemente le nivello qualitative del vita del citatanos, ma il es un cosa que io non memora de haber vidite in ulle altere loco. Del altere latere, le indicationes temporal que il ha in le stationes del metro es, in mi opinion, totalmente inutile: illos monstra le tempore passate del ultime traino o, in altere parolas, quante secundos ha passate desde le arrivata del precedente traino. Pro abbatter ulteriormente le utilitate de iste indication, on me ha dicite que le trainos non sempre passa con le mesme frequentia, assi que le cognocentia del tempore passate del ultime traino pote esser utile solmente pro lamentar se con expressiones simile a iste: “Io ha mancate mi traino pro solmente X minutos e Y secundos!”.

Fin del parte 2 Io va scriber le resto in un futuro insperabilemente proxime Per ora, continua a reguardar le photos in le galleria!

San Petroburgo, Parte 1

Como promittite, io va scriber super mi viage a San Petroburgo, realisate le fin de septimana passate; si, solmente duo dies, sabbato e dominica, in expectation de vader pro un periodo plus longe in augusto. Pro initiar, io presenta le medio de transporto:

Ford Transit!

Le partentia esseva fixate al horas 20:00, ma esseva posticipate de circa medie hora a causa de alicun viagiatores in retardo; evidentemente le compania del mini-bus prefere attender medie hora que perder 25 euros de billetos (si, isto es le precio!). E isto pare esser un situation bastante normal, perque necuno protestava o se lamentava. Le viage ha requirite circa 7 horas, ma gran parte de iste tempore esseva empleate pro recuperar alicun viagiatores que se trovava in varie partes del Finlandia (fortunatemente non troppo distante de Helsinki), como Vantaa, e, al conclusion del viage, pro portar a varie addresses specific de San Petroburgo les qui lo demandava (fortunatemente le possibilitate non es extendite al complete territorio del Russia). Alteremente, io crede que le viage haberea requirite solmente 5 horas, viste anque que nos esseva multo fortunate in le passage del confinio (il non habeva quasi ulle persona ultra a nos).

Al matino, quando io ha arrivate a destination, mi amica Yulia me attendeva con su patre, pro portar me a casa. No, io non va explicar qui es Yulia! Per le automobile, isto requireva non plus que 20 minutos, durante que quando in le sequente dies nos refaceva le mesme percurso con medios public (bus plus metro), le tempores se dilatava, e le transporto prendeva circa trenta o quaranta minutos. A iste proposito, ante mi viage un amica russa me diceva que alicun turistas italian qui visitava San Petroburgo esseva multo impressionate per le profonditate del metro; e io confirma lor impression: le tempore que prende le scalas mobile pro vader a basso es circa 3 o 4 minutos, dependente del station. Il ha 4 lineas de metro, a nivellos differerente.

Un station del metro — Площадь Александра Невского (placia de Alexander Nevsky)

Iste photo del metro me ha costate le bellessa de 100 rublos perque immediatemente post que io lo ha prendite, un officiero de policia me ha communicate que il es prohibite prender photos del stationes, como mesura anti-terroristic. Ridicule, nonne? Excludente le facto que le photos del stationes es presente in abundante quantitate in le internet, io dubita que terroristas essera fermate per iste prohibition, sia perque illes poterea facilemente prender photos sin que le policiero les vide, sia perque le policiero es quasi sempre absente e sia perque probabilemente illes non essera espaventate per le pagamento de iste grandissime summa de danaro. Mmm… attende… quante euros vale 100 rublos? Circa 3. (Tres, TRES, TRES). Ah.

Fin del parte 1 Io va scriber le resto in un futuro sperabilemente proxime Per ora, reguarda le photos in le galleria!

Attende…

Le actualisation de mi blog, que jam esseva infrequente, in le ultime tempores es ancora plus critic, quasi inexistente. E le cosa le plus grave es que io non saperea dicer qual es le rationes de isto. Un ration poterea esser le aquisition de un Nintendo Wii, accompaniate per Mario Kart (si tu anque lo ha, e vole excambiar le codice, scribe me), que es un passatempore irresistibile; o forsan le passion photographic, viste que multe de mi recente invios concerne le photographia; o forsan… un femina? No, isto non pote esser! Qualcunque sia le ration, io promitte solemnemente que in breve tempore io devenira diligente e vos informara super le recentissime (e brevissime) viage a San Petroburgo (ubi io passava mi fin de setimana, e ha retornate heri nocte).

Pro calmar vostre ardente expectation, io vos contenta con le exhibition in le galleria de mi secunde pellicula 35mm. Iste vice io ha demandate al boteca photographic de dar me le photos in version digitalisate, in un CD; le costo total (developpamento plus scannerisation) es de 13 euros, e io ha essite multo satisfacite per le resultato.

Involution

Durante que le major parte del photographos ha passate del photographia in pellicula (analogic) al photographia digital, io ha percurrite le strata opposite, e ha comprate un photocamera analogic. Le ration de iste selection es in maxime parte debite a mi curiositate pro un technologia provate e laudate pro su qualitate. Io voleva facer un pauco de experientia con le pellicula, ante que su gradual disapparition lo rende obsolete (assi io potera contar a mi numerosissime discendentia, que io ha photographate sur pellicula!). Io ha comprate de Japon un camera Minolta α7 (in Europa illo se appella Dynax 7), que probabilemente es le modello le plus avantiate de cameras analogic producite per Minolta; io ha seligite iste camera perque le montatura es perfectemente compatibile con illo del objectivos de mi Sony α, ergo io non debe affrontar un duple expensa. Le sol nota que merita attention es le facto que le pellicula 35mm es plus grande que le sensor CCD del Sony α que es circa 24mm, e le objectivos que es projectate specialmente pro le sensor del Sony rendera un immagine partialmente obscur longo le bordos del quadro del pellicula. Del altere latere, isto significa que le objectivos que es compatibile con ambe le formatos, in le 35mm rende un angulo de visual multo major, e isto es un del motivationes que me ha convincite a comprar un camera analogic. Ma basta parolas! Io ha developpate mi prime pellicula, e le imagines es in le galleria; io los ha cargate totes, benque multe es quasi impresentabile (pro alicun ration, le focus es errate). Ah!, ante que vos me accusa de incapacitate/follia, lassa me dicer que le photo a latere es realisate con un lente de typo “fisheye” (oculo de pisce), un grandangulo con un accentuatissime distorsion — isto es un effetto intendite, non impreviste!

Mappa Pro Cyclos

Iste matino, incoragiate per le favorabile conditiones atmospheric, io ha decidite de prender mi bicycletta pro tentar de levar me de mi constante stato vegetative. Il ha multe areas proxime a Helsinki que on pote facilemente attinger per un bicyclo, e io ha visitate solmente un parve fraction de los; pro isto, il me pareva un bon idea probar a explorar un loco nove. Ante partir, io ha consultate le internet pro trovar un mappa del area a visitar (mi spirito explorative non es ancora multo developpate) e io ha trovate que le sito del transportos public contene un section dedicate al cyclistas: in le Journey Planner for cycling il ha un mappa interactive del region de Helsinki, Espoo e Vantaa, in le qual il es possibile inserer le location de partentia e de destination e le systema computa le via cyclabile inter los e lo monstra in evidentia in le mappa:

Le mappa evidentia le tractos de strata de diverse typo; nota que quasi tote le itinere es sur vias cyclabile, sur le qual automobiles non passa!

Altere belle functiones de iste sito include le possibilitate de evidentiar locos de interesse pro cyclistas e sportivos in general: servicios de prestito de bicyclos, parcamentos pro bicyclos, tractos de strata especialmente rapide o scarpate, locos pro sport (externe, claudite, acquatic, etc. — oh, mesmo pro animales!), cafés e refugios, semaphoros e altere cosas plus o minus interessante como stationes, scholas, botecas, etc.
In ultra, il es possibile anque evidentiar alicun percursos especialmente interessante:

Le percurso scenic (nota le scala!)
Le percurso del costa de Espoo

sin considerar un lista de percursos national e un mappa del stratas que evidentia le varie typos de terreno.

Le question del die es: perque il non ha un servicio simile in Italia? Ah, que stupide, io quasi oblidava: in Italia nos non ha percursos cyclabile!

P.S.: no, io non ha cyclate tote le percurso del prime mappa! Io tosto prendeva altere stratas, plus proxime al costa marin, e arrivava a Haukilahti (que es le loco marcate in le mappa per le distantia “8.0 km”) e postea invertiva le direction e tornava a casa per le via decidite per Journey Planner.

Reduction a Blanc E Nigre

In iste pagina del galleria io ha cargate mi ultime album de Lauttasaari (infortunatemente pro vos, le “ultime” debe esser intendite solmente in senso de vicinitate temporal). Benque tote le photos es quasi identic a les que io ha prendite precedentemente, iste vice le subjecto del photos esseva le area in le Sud-Est de Lauttasaari. Con mi (non troppo grande) surprisa io trovava un altere parve plagia, que es multo simile a le que io jam photographava; con le differentia que in iste il non ha un nave pro le jocos del infantes. Inter le quantitate de photos insignificante que io prendeva, il habeva un que esseva particularmente insignificante, e que io esseva in le puncto de deler; ma pro curiositate, io decideva de experimentar e convertir lo in blanc e nigre, pro vider si le photo acquireva un senso proprie. Le conversion automatic a blanc e nigre reduceva le visibilitate del elementos de disturbo que il habeva in le fundo, ma al mesme tempore destrueva le contrasto e rendeva le imagine plan e enoiante. Un del multissime utile — e confuse — functionalitates de The Gimp es le channel mixer, que permitte de specificar le intensitate del tres componentes de color (rubie, verde e blau) del imagine; iste function, combinate con le transformation in monochromia, permitte de calibrar manualmente le “peso” del colores in maniera tal que le imagine in B/N non resulta totalmente plan, e le differentias inter le areas de color que le autor considera plus importante es preservate. In basso on vide le resultato — io ha essayate de calibrar le colores de maniera que le photo appare multo contrastate. Le photo es ancora insignificante, ma a prime vista illo appare interessante e io ha decidite de non deler lo (clicca pro ingrandir lo). :-)

Aviditate

Mi prime experimento con The GIMP, le plus famose programma pro Linux de edition de imagines:

Aviditate

Normalmente io non ama modificar le photographias con processos informatic, perque io ha le sensation de “fraudar” le spectator. On deberea producer photos belle, sin besonio de alterar los. Certemente le alteration per computator de un photo pote render resultatos excellente, ma io crede que illo es un arte per se, differente de lo que usualmente on intende pro “photographia”. Ma post que on debe probar toto in le vita, io ha probate a modificar un photo (lo que vos vide) per mantener le colores sur le ponte, e render blanc e nigre toto le resto. Le resultato non es perfecte, ma si on non aggrandi le photo, le defectos es difficilemente perceptibile. Totevia io non es totalmente satisfacite, perque le photo non transmitte le senso que io voleva poner in illo — forsan un augmento de contrasto haberea adjutate. Pena es, que ora il es troppo tarde: io salvava le photo modificate sur le archivo original, que ergo es perdite…