Mardy (Entratas super cinema)

The Lego Movie 2, un surprisa positive

Alberto Mardegan — Sun, 10 Feb 2019 19:06:01 GMT

Heri io e mi sponsa ha accompaniate mi filios al cinema, pro guardar le film "The Lego Movie 2". Isto es un film de animation tridimensional que, como le titulo suggere, narra le aventuras de nostre amate minifiguras Lego.

&lt;a href="https://www.comingsoon.it/film/the-lego-movie-2/54930/video/?vid=30888"&gt;Le &lt;i&gt;trailer&lt;/i&gt; del version italian del film&lt;/a&gt;

Le trailer del version italian del film

Il es possibile que isto sia causate da mi basse expectationes, ma io confessa que le film me placeva multo, e in alicun momentos esseva multo plus profunde de altere filmes mirate a un publico plus adulte. E a iste puncto io vos consilia de stoppar le lectura de iste entrata, si vos plana de guardar le film: io va revelar alicun partes del historia, e si vos non vole que vostre surprisa sia guastate, stoppa de leger me hic.

(A iste puncto uno poterea demandar se qual es le senso de parlar vos de iste film, viste que illo obviemente non es interessante pro vos; ma io non va poner me iste question, e continua.)

Lo que plus me colpava es un drammatic colpo de scena (inexpectate inversion del eventos) que mirabilemente presenta un confusion del conceptos de bon e perfide: in breve, isto occurre quando Emmet, le protagonista, es sur le puncto de liberar su amate Lucy e altere su amicos qui esseva captivate per le folle e perfide habitantes de un planeta lontan. Il es in iste momento, que Lucy comprende que illes non del toto es folle e perfide, ma sinceremente amicabile; illa comprende que illa esseva victima de un mal comprension causate per su prejudicios, e alora illa cerca, inutilemente, de convincer Emmet a abandonar su plano de destruction de iste population extra-terrestre.

Iste momento es terribilemente actual, mesmo in le terminologia usate, quando Emmet accusa Lucy de haber essite le victima de un lavage del cerebro (anglese: brainwashing) que la impedi de vider le realitate, sin realisar que il es proprio ille, le qui ha un vision completemente distorte del realitate e ha totalmente invertite le conceptos de ben e mal.

Iste passage ben describe le problema del incommunicabilitate inter personas qui ha ideas opposite e qui es profundemente convincite que le altere non comprende, e que nos ha le mission de portar le al veritate. Un tema que es sempre actual, e jammais solvite.

Complexivemente, le film es multo agradabile, con multe action, un poco de comicitate, e anque alicun momentos multo toccante emotivemente — benque isto pote esser causate del facto que io, in guardar le film con mi filios, empathisava con illes e projectava super me lor emotiones (o melio: lo que io imaginava esser lor emotiones). Un hora e medie que io non regretta haber passate in le cinema!

Summer Time Machine Blues - Viages temporal

Alberto Mardegan — Sat, 19 May 2007 20:00:00 GMT

Pro le amantes del cinema, io ha un titulo a consiliar: Summer Time Machine Blues. Benque le nomine del film pare anglese, de facto il se tracta de un film made in Japan, que difficilemente essera publicate in Europa o foras del Japon: il non ha samurais, yakuzas o geishas que pote capturar le interesse del publico occidental, ma solmente un gruppo de juvene amicos que viagia in le tempore. Le idea non es nove, illo es jam utilisate in multe filmes con differente intentiones: a vices le viage in le tempore es un pretexto pro introducer un aventura fantastic, a vices illo es le thema de episodios de scientia fictive, sci-fi, plus o minus plausibile logicamente. Le imagination non ha limites, e viages temporal pote esser un bon argumento pro fantasticar; imaginar le futuro es un cosa, ma il es facile e inevitabile discoperir que le viage in le passato causa un absurdo logic que rende tote le scena irrealisabile. Summer Time Machine Blues supera, con inventiva e originalitate, le paradoxos que se crea quando on viagia in le passato, e se explica in un sympathic mixtura de humorismo, absurditate e logica infallibile, que al fin non mancara de portar le spectator a reflecter super le conceptos de tempore e necessitate.

Io ha trovate un trailer in YouTube, ma illo es sin subtitulos...

Naisu no mori: The First Contact

Alberto Mardegan — Sun, 10 Dec 2006 21:00:00 GMT

Heri vespere io ha vidite le film plus estranie in mi vita: Naisu no mori: The First Contact. Illo es un film japonese, que non pote esser classificate in ulle genere cinematographic; illo es un collection de curte historiettas (non sempre sensate), que con le developpamento del film deveni in alicun modo relate — ma non bastante pro dar lo un senso. Alicun del historiettas es normal, realistic; alteres es completemente absurde, e involve creaturas phantastic realisate in computer graphics que pare vermente real. Il es impossibile pro me narrar super iste film, e le unic ration pro le qual io ha scribite iste entrata es pro stimular vostre interesse — ma obviemente necuno lo reguardara, a minus que ille veni in Finlandia pro vider lo. ;-)

Celebritate

Alberto Mardegan — Mon, 04 Dec 2006 21:00:00 GMT

E ben, si! Finalmente io ha devenite un celebritate in tote le Finlandia, justo 20 minutas retro! YLE – TV2, un del principal canal televisive finnese, monstrava un servicio integremente dedicate a JollyDragon e pro alicun secondos io etiam appareva in illo. Le filmato es disponibile in Google video, ma solmente mi amicos qui es presente in le video es authorisate a vider lo. ;-)

E in un magazin de Oulu, Äijä, il ha un articulo super JollyDragon con photos de un Weekly Welcome e un breve intervista a Zeeshan e a me. Infortunatemente io non ha un copia de iste magazin, ma spera que tosto le articulo sera disponibile in le sito internet de Jollydragon.

La guerra di Mario

Alberto Mardegan — Mon, 13 Nov 2006 21:00:00 GMT

La guerra di Mario es un film italian ambientate in Napoli, que narra le historia de un infante "del strata" (Mario) qui es adoptate per un familia de bon stato social. Iste vespere io ha vidite iste film in compania de altere italianos e, contrarimente a mi expectationes, le film me ha placite. Forsan le motivation es justo le facto que io expectava nihil, e isto esseva plus que nihil. :-) Le film non esseva multo realistic, in mi opinion alicun aspectos esseva excessivemente emphatisate, supertoto le permissivitate del matre adoptive qui de facto concedeva toto lo que Mario demandava e perdonava tote su trasgressiones (e a vices los laudava!).

Il es natural que, al termino del film, on se demandava qual effecto iste projection poterea haber super le publico finnese: le mundo representate es le summa del basse criminalitate. Io non sape quanto isto corresponde al realitate de Napoli — io lassa a alteres iste comparation — ma in omne caso io non es minimemente preoccupate per lo que pensa le finneses: illes sape certamente que un film non es necessarimente fidel al realitate. Si io debeva judicar le Japon o le Corea del Sud basante mi opinion super le filmes que io ha vidite, io dicerea que ille locos es invivibile: violentia e follia sin limites! (io obviemente non me refere a filmes como Godzilla o Gamera, que es clarmente imaginari)

Pro exemplo, io invita totes a reguardar un de mi filmes preferite, Old Boy. :-)