Mardy

Le incontro nordic de interlingua es un evento biennal que ha loco in un pais scandinave, usualmente in Svedia viste que le costo del vita non es exaggeratemente alte e que il ha plus interlinguistas active. Io participava nonobstante que io non es propriemente un nordico, e trovava que io non esseva le sol participante abusive del gruppo: il habeva altere spiones de Germania, Hungaria, Francia, Grande Britannia e, curiosemente, Japon.

Isto non esseva exactemente un conferentia, ma un reunion; in le prime tres dies il habeva cursos de interlingua pro comenciantes e cursos avantiate, que non faceva parte del incontro nordic ma esseva realisate pro facilitar le participation de tote interessatos, e pro unir duo eventos in le mesme occasion. Officialmente, le incontro durava solmente duo dies, initiante le postmeridie de venerdi e terminante le postmeridie de dominica. Io arrivava jovedi, in le tarde nocte pro causas que io non va repeter, e ergo non participava al cursos de interlingua (isto explica perque io scribe tanto mal). Ma io poteva facer multe altere cosas interessante, per exemplo

mangiar fructos que se trovava in abundantia, visitar le universitate de matematica

e notar como iste studentes debe observar le regulationes le plus stricte e tyrannic,

spiar le organisatores durante que illes confabula,

o personas qui roba preciosissime libros in interlingua,

o curre pro facer un photo de gruppo con le tempore contate,

visitar villages phantasma, e pro finir

esser spectator de un concurso sportive pro conilios. Sin oblidar altere evenimentos importantissime, qual le intervista a me per parte de Peter Kovacs que ha revivificate Radio Interlingua, le bon surprisa de Ingvar Stenström (un del veteranos — o melio, juvene veteranos — de interlingua) quando on le ha conseniate un copia de su libro in anteprima (le libro es probabilemente in phase de publication in iste dies), e altere cosas plus o minus interessante que vos pote certemente trovar si vos visita le galleria.

Pin Ion es un banda finlandese qui sona musica rock. Io cognosce le cantante del gruppo, H-P (istos es le initiales del nomine, que remane un secreto non revelabile), que es anque le marito del arrangiator artistic de nostre gruppo theatral.
Heri le cinque pinniones sonava in le bar Texas, que nonobstante le nomine se trova in le centro de Helsinki, e io vadeva con alicun amicos a audir lor musica. Alicun cantos esseva in finlandese, ma le major parte esseva in anglese; totevia isto non significa que io poteva comprender lor texto, que esseva difficilemente audibile (ma isto es un “problema” commun al cantos rock, especialmente quando illos es sonate a alte volume in un parve local). Ma le musicas esseva appreciabile e postea audir los in le bar io ha discargate alicun mp3-es del mesme cantos del sito del Pin Ion-es e los trova multo belle.

Io ha prendite le occasion pro facer alicun photos del evento, que vos pote “admirar” in le galleria.

Isto es le manifesto del representation de nostre tragedia, Faustus, extrahite del opera The tragical history of Doctor Faustus per Christopher Marlowe. Ancora il non es clar si nos va representar un tragedia, o si nostre representation essera un tragedia.
In omne caso, illes qui se trova in Helsinki in le 9 de majo e vole passar duo horas in maniera differente, pote reservar un sedia per scriber a helsinkitheatre@gmail.com (in anglese!). Le gruppo se ha formate in septembre 2007, e nos ha initiate a practicar iste tragedia del initio de iste anno, quasi cata septimana. Le recitation essera in anglese, pronunciate con varie accentos differente a causa del differente provenientia del actores. Io parlara in anglese con accento interlinguista. ;-)

Con un mense e un die de retardo, io publica alicun photos que io habeva oblidate in mi photocamera — un cosa aliquanto inusual pro me.
Le photos es prendite le prime de majo, le festa international del laboratores; in Finlandia iste festa es appellate Vappu, parola que probabilemente es un finnisation del nomine de Sancte Walburga e es cognoscite in le paises nordic per le
nomine “nocte de Walburga”. Iste festa es particularmente significative pro le studentes finlandese, perque illo coincide approximativemente con le termino del anno scholastic (e universitari), e gania un grande participation gratias al facto que illo es le prime grande festivitate del primavera.
Como usual, le festa es un importante occasion pro biber multe alcohol, ma le characteristica que vos probabilemente observara in le photos es le facto que multissime personas porta un bonetto blanc: illo es parte del costume official que le studentes porta quando illes ceremonia lor graduation al schola secundari. Un altere characteristica del festa es que in le multitudine del personas il ha plure gruppos que porta un supertoto (italiano: tuta, anglese: overall) que es distinctive pro le gruppo; in le caso del studentes universitari, il pare que illes se collige in gruppos a secunda del facultate universitari que illes studia.

Reguarda le photos hic: Galleria del Vappu — illes qui ha vidite Helsinki in hiberno essera surprendite de vider como in primavera il ha si multe personas!

1me de majo: Vappu!