Mardy

Transparency Internation ha publicate le tabula del “Indice de Perception de Corruction” (CPI, in anglese Corruption Perception Index), que mesura le grado de corruption del officieros e del politicos, derivate per un quantitate de fontes differente.

Iste anno, le situation de Finlandia e Italia se ha pejorate; Finlandia ha passate del prime placia que illo teneva in le 2007, a un misere e vergoniose quinte position, durante que Italia ha precipitate del 41me al 55me placia, que es comocunque un position dignitose pro un pais como le nostre.

Secundo le studio, paises como Botswana, Oman, Bahrain e Bhutan, que io vos defia a locar exactemente in un mappa geographic sin nomines, es minus corrupte que Italia; ma iste studio es obviemente non veritabile, perque illo es in total contrasto con le facto que nulle citatano italian cognosce alicun persona que ha essite effectivemente in prison a causa de corruption!

Ma pro le credulones, ecce le tabulas pro le 2007 e pro le 2008

Iste vespere io curiosava in Ebay, inter le multitude de offertas de objectivos photographic, sin un particular idea. Mi interesse esseva captivate per alicun lentes Zenitar, in quanto Made in Russia, e immediatemente io cliccava pro satisfacer mi curiositate e vider le detalios del offerta. Le venditor es un boteca electronic de Moskva, e quasi tote le material que illes ha es manufacite in Russia. Ma io sape que vos non es interessate in isto. Le ration pro le qual iste offerta es tanto interessante pro me (e le ration pro le qual io scribe iste lineas in loco de vader a dormir) es un nota in grande characteres rubie que es presente in tote le insertiones de iste venditor:

Sin emphatisar le errores grammatical del nota, io lo traduce pro illes qui non comprende anglese: “Attention! Nos non face expeditiones a Italia. Il ha grande retardos e multe paccos ha essite perdite. Tote le compras per compratores italian essera cancellate. Nos spera que vos comprendara”. Io memora que ante alicun tempore io trovava annuncios simile in Ebay, ubi on diceva que on non expediva a Italia e China. Ma ora, nos ha remanite sol. Le sol pais in le mundo al qual le russos non invia paccos es Italia, perque nostre servicio postal non es considerate efficiente e digne de confidentia. Isto pote apparer sensational pro illes qui non ha vivite in Italia; ma pro nos, ubi es le surprisa?

Reguarda iste photographia con attention:

Illo es un Cebus capucinus, o “capucino del capite blanc”, un simia que habita in le forestas del America del sud. Perque io es interessate in iste animal? Le responsa es in mi jardin (le catto rubie es mi adorate Pastiglio):

Vamos aggrandir le photo del ospite...

Ah!!! Le catto-simia!!!

Illes qui vole vider mi jardin, con Pastiglio e le catto-simia, es benvenite in le galleria.

Dominica io me trovava in le placia del mercato, kauppatori (del qual on pote vider un animation panoramica a 360 grados), e post que il esseva un bellissime die de sol, io prendeva un photo pro capturar le sensation.

Lo que forsan non es evidente, es que le sol esseva quasi perfectemente a sud: le hora esseva 13:46.

Sol hibernal, horas 13:46 (16 de decembre).

Iste matino io ha recepite un carta postal de augurios de bon Natal, totalmente inexpectate.

Gratias! Ma... qui es le author?

Oh! Illes es mi amicos de K-RAUTA, un negotio de equipamentos pro le casa, que io ha sovente visitate durante iste estate, quando io renovava mi appartamento. Io lo visitava tanto frequentemente, que mi amicos burlava in dicer que tote le personal de K-rauta me cognosceva personalmente. Mmmm... que dicera illes post saper de iste carta postal?

Un bon parte del italianos qui io cognosce a Helsinki es amicos incontrate in partitas de calcetto (io non cognosce le vocabulo anglese, ma io intende le partitas de football que on joca con 5-6 jocatores pro equipa — mini football?); quasi omne sabbato postmeridie nos va jocar un partita. Purmente amical, sin agonismo e tension. Io es un pexime jocator, ma nonobstante isto io ama iste sport e io cerca de non mancar ulle incontro.

Durante le hiberno nos joca in un sala coperite, pro evitar le risco de congelamento. ;-) Le sala es optime pro nos, e offere duchas e sauna. Toto ha sempre essite perfecte.

Le ultime sabbato nos debeva interrumper le incontro pro alicun minutos, durante le quales tote nos teneva lor oculos a reguardar le tecto del sala:

Le palla esseva bloccate inter le cavos que rege le lampas!

Pro le cronaca, nos continuava le partita con un altere palla, perque nos non succedeva in recuperar le nostre.

Zeeshan me ha inviate iste ligamine a un articulo que presenta un test pro verificar si tu usa majormente le parte sinistre o dextere de tu cerebro. Vide iste animation:

Esque le dansatrice rotea in senso orari o antiorari? Le articulo sustene que si vos vide le dansatrice rotear in senso orari, vos usa majormente le parte dextere del cerebro, e vos usa le parte sinistre si vos lo vide dansar in senso antiorari. Il es possibile vider le dansatrice rotear in ambe sensos, como le test ipse affirma.

Personas qui usa majormente le parte dextere de lor cerebro ha un personalitate tendentialmente sentimental, durante que le sinistres es rational.

Io non crede que iste test ha ulle validitate, perque le maxime parte de mi collegas (includente io) videva le dansatrice rotear in senso orari (lo que significarea que nos es sentimental, e non rational!). De facto, io crede que isto es solmente un joco optic, totevia il es bastante amusante vider como personas vide le mesme cosa e lo interpreta differentemente. Le ambiguitate es debite al facto que le animation es bidimensional, e quando nostre cerebro lo elabora pro construer un imagine tridimensional, illo adde un dimension — ma le direction de illo es absolutemente libere, e lassate al interpretation.

Finalmente mi licentia de guida es preste! Io ha convertite mi licentia de guida italian in uno finlandese, pro un obvie avantage:

Eh si! Le licentia es valide usque a 70 (septanta) annos de etate!

YouTube e Google Video es un ver miniera de "guastatempore": quando on ha alicun minutos a perder, on pote navigar in le enorme archivo de videos e trovar un modo pro passar le tempore que non require quasi ulle activitate cerebral. Un sorta de television, con le importante differentia que con iste systemas on ha un major controlo super lo que on vole vider.