Novas in familia

Sabbato 28 julio, al octo horas del matino, Alessandro (io suppone que le nomine in interlingua es Alexandro) nasceva! Io assisteva al nascentia e habeva le honor de taliar le funiculo umbilical; toto esseva extrememente emotionante, al puncto que io non pote memorar mi pensatas — io crede, que mi cerebro esseva in como in apnea, totalmente vacue.

20 minutas de vita

Nos passava le due dies successive in le hospital; illo esseva plen, ma fortunatemente on poteva arrangiar un camera familiar (pro le infante, Yulia e anque pro me); le infermera multo se excusava pro le conditiones de nostre camera.

Un del muros del camera

Nonobstante le apparentia vetule del camera, nostre permanentia esseva multo comfortabile.

Duo dies de vita

Quando nos finalmente sortiva, io vadeva quasi spontaneemente a comprar flores pro mi amata.

Justo ante le partita del hospital

Le dies veniente, nos recipeva le visita del genitores de Yulia. Illes nos adjutava multo, e permitteva nos de prender alicun pausas de nostre nove principal occupation (que es comocunque un occupation totalmente amabile).

Le prime promenada pro le infante, con le parte russe del familia :-)

Durante iste septimana, nos ha portate Alessandro a promenar cata die; ille sempre dormi profundemente durante le cammino, e nulle movimento improvise pare poter eveliar le (lo que es le contrari de lo que eveni durante le nocte!).
Ancora nos debe comprender totalmente como nostre vitas va cambiar gratias a iste felice addition al familia; pro le momento, nos es solmente occupate a gauder de illo.